«Ман Сити» яримҳимоячиси Яҳё Туренинг агенти Дмитрий Селюк уни қонида алкогол моддаси қаердан пайдо бўлгани ҳақида гапирди.

Футболчи автомобилни маст ҳолда бошқарганликда айбланиб, уни бошқариш ҳуқуқидан 18 ойга маҳрум қилинган ва 54 минг фунт жаримага тортилган эди.

«Яҳё мусулмончилик қоидаларига амал қилади ва ичмаган, бундан кейин ҳам ичмайди. У ҳатто жамоани тақдирлаш маросимларида ҳам шампан виносидан бош тортади. Гвардиола буни билади, шунинг учун ҳам футболчини жазоламаган.

Яҳё дўстларидан бирининг туғилган кунига борган. Кимдир кока-кола ва шарбат идишига алкогол моддасини қўшиб қўйган. Яҳё буни билмасдан уларни ичган. Агар у ичимликларда алкогол борлигини билганида, қўлини ҳам теккизмасди.

Албатта уни автомобилни бошқариш ҳуқуқидан маҳрум қилиниши яхши иш бўлмади. Бироқ қонун олдида ҳамма тенг» - деди Селюк.