Ўзбекистон бош вазири виртуал қабулхонасига спортга оид 1100 та мурожаат келиб тушди. Бу ҳақда Маданият ва спорт ишлари вазирлигига таяниб «Спорт» газетаси «Дарё»га маълум қилди.

Мурожаатларнинг катта қисми футбол соҳасига оид бўлиб, фуқаролар фарзандини футбол мактабларига жойлай олмаётганидан шикоят қилган. Шунингдек, Ўзбекистон миллий терма жамоасининг ўйинларини танқид остига олганлар ва футболда ислоҳотлар қилиш кераклигини таъкидлаётганлар ҳам бор.

«Мурожаатларга асосли жавоб бериш мақсадида Ўзбекистон Футбол Федерациясида махсус штаб ташкил этилди. Ишчи гуруҳ аъзолари эрталаб 8 дан 11 гача махсус қабулларни ташкил этади. Улар орасида ЎФФ бош котиби, терма жамоалар маркази ва ПФЛ директорлари, ҳуқуқшунослар бор. Мақсад — ҳар бир фуқаро ташкилот ишидан қониқиш ҳосил қилсин. Айни вақтда бу иш ўз самарасини бермоқда», — деб таъкидлаган Маданият ва спорт ишлари вазирининг биринчи ўринбосари Мурод Алиев «Спорт» газетасига берган интервьюсида.

Замонавий илмий-техникавий ютуқлар асрида халқ билан ишлашнинг янги даври бошланди. Ҳеч ким ва ҳеч бир мурожаат эътибордан четда қолмайди. Муҳими, демократик тамойилларнинг амалдаги акси мана шу босқичда яққол намоён бўлади, деб газетадаги мақолага якун ясалган.