Италия суперкубоги учун ўйин Қатар пойтахти Доҳа шаҳрида ўтказилди. Соврин учун "Ювентус" ва "Милан" клублари баҳс олиб боришди.

Баҳснинг 18-дақиқасида "Юве" ҳисобни очди. Бурчакдан етказилган узатмани Кьеллини бош билан дарвозага жойлаб қўйди. Танаффусга қадар "россонери" ҳисобни тенглаштиришга муваффақ бўлди. Сусо ўнг қанотдан етказган узатмани Боневентура 11 метрли нуқта устида бош билан зарба бериб, дарвозага жойлади.

Иккинчи бўлимда вазиятлар яратиш бўйича "Милан" устунликка эришди. Романьоли бош билан зарбадан сўнг тўп Буффоннинг устидан ошиб ўтди, аммо тўсинга тегиб қайтди. Асосий вақтда ҳисоб очилмагач, ҳакам қўшимча бўлимлар белгилади. Унинг дебютида Бакка ажойиб имкониятдан фойдалана олмади. У яқин масофадан дарвозанинг бўш қолган қисмига тўпни жойлай олмади.

Худди шунга ўхшаш вазиятда Дибала яқин масофадан дарвозага аниқ зарба бера олмади. Ғолиб номи пенальтилар сериясида аниқ бўлди. Серия бошида ҳар иккала жамоадан бир футболчи — Лападула ва Манжукич пенальтини голга айлантира олишмади. "Ювентус"дан Дибала бешинчи бўлиб зарбани ижро этди. Доннарумма эса уни қайтарди. Пашалич "Милан"нинг бешинчи зарбасини голга айлантирди.

Шу тариқа, Италия суперкубоги "Милан"га насиб этди. Бу "россонери"нинг сўнгги беш йилда қўлга киритган биринчи соврини бўлди.

Италия суперкубоги
Ювентус – Милан 1:1 (1:1, 0:0, 0:0, 0:0), пенальтилар - 3:4
Голлар: 1:0 – 18 Кьеллини, 1:1 – 38 Бонавентура.
Ювентус – Буффон, Лихтштайнер, Ругани, Кьеллини, Алекс Сандро (Эвра, 33), Хедира, Маркизио, Пьянич (Дибала, 67), Стураро (Лемина, 79), Манжукич, Игуаин.
Милан – Доннарумма, Романьоли, Де Шильо, Абате (Антонелли, 102), Палетта, Куцка, Локателли (Пашалич, 74), Бонавентура, Бертолаччи, Сусо, Бакка (Лападула, 102).
Огоҳлантиришлар: Лихтштайнер (35), Романьоли (43), Куцка (58), Де Шильо (70), Игуаин (120).