27 декабрь куни Қўқон шаҳридаги “Ўрда” ресторанида “Қўқон-1912” жамоаси 2016 йил якунлари ва янги йил муносабати билан байрам тадбирини ўтказди.
Тадбирда Қўқон шаҳар ҳокими Акрамжон Анорқулович Абдуллаев, Фарғона вилоят Футбол федерацияси биринчи вице-президенти Тоҳир Кападзе, клуб раҳбарлари, мураббийлар, футболчилар, ОАВ вакиллари, “Марказий” ўйингоҳ ходимлари ва мухлислар иштирок этишди.
Тадбирда таниқли сўз устаси, актёр Анвар Мирзо бошловчилик қилди. Дастлаб Қўқон шаҳар ҳокими Акрамжон Абдуллаев тадбирни очиб бериш учун сўзга чиқди.
– Ассалому алайкум ҳурматли меҳмонлар ва футболчилар. Барчангизни кириб келаётган янги йил билан табрикайман. Якунига етган футбол мавсум биз учун оғир кечди. Лекин шундай бўлса-да, чемпионат якунида ўз олдимизга қўйган вазифани уддалай олдик. Янги мавсумда жамоамиз олдига юқори мақсадларни қўямиз. Насиб бўлса, мухлисларимиз ҳали Осиё Чемпионлар лигаси ўйинларидан баҳраманд бўлишади.
Қўқонлик футбол мухлислари ўта талабчан. Шунинг учун янги мавумда жамоа олдига 6-ўринни олиш вазифасини қўямиз. Бунинг учун “Қўқон-1912” жамоасида барча имкониятлар мавжуд.
Шундан кейин мавсум давомида “Қўқон-1912” жамоаси вакилларига қимматбаҳо совғалар тақдим этилди.
Жамоани қийин вазиятдан олиб чиққан бош мураббий Нўъмон Ҳасанов, якунланган мавсумнинг энг яхши футболчиси деб топилган Носир Отақўзиев, янги мавсумни мураббийлар штабида бошлайдиган Азиз Тўхтабоев ва Андрей Баклановлар қимматбаҳо совғалар билан тақдирланишди.
Шундан кейин сўз навбати Фарғона вилоят Футбол футбол федерацияси биринчи вице-президенти Тоҳир Кападзега берилди. Бир неча йил Қўқонда фаолият олиб борган таниқли мутахассис барчани янги йил билан табриклар экан, қисқача ўтган йилги натижаларни ёдга олиб ўтди. Шунингдек, Тоҳир Кападзе янги мавсум олдидан “Қўқон-1912” жамоасига омад тилади.Бндан ташқари, вилоят ҳокими вакили Маъруф Турдиматов ҳам барчани янги йил билан қутлаб, янги мавсум олдидан жамоамизга омад тилади.
Айтганча, шу куни “Мухлислар клуби” вакиллари ҳам жамоа томонидан тақдирланишди. Хусусан, йил давомида жамоа билан бирга бўлган “Мухлислар клуби га “Ташаккурнома” ҳамда қимматбаҳо совғалар берилди.
Тадбир давомида шунингдек, бир қатор мутахассис ва мухлисларга ҳам сўз берилди.
Тадбирда янграган дилтортар қўшиқлар барчага хушкайфият улашди. Бир сўз билан айтганда, ушбу тадбир янги мавсум олдидан жамоа аъзоларига қувонч бахш этди.
Шу тариқа «Қўқон-1912» футбол клуби ортда қолган мавсумни юқори кайфиятда тугатди.
