Тошкентнинг «Локомотив» футбол клубида 2 нафар Кот-д'Ивуар вакили кўрикдан ўтаётгани ҳақида хабар берилганди. Шулардан бири – 19 ёшли Гноҳере Кризо «темирйўлчилар»нинг «Олмалиқ» жамоасига қарши назорат ўйинида 2 та гол урди.
«Локомотив» матбуот хизматининг Telegram’даги каналида маълум қилинишича, назорат ўйини «Локомотив»нинг 3:1 ҳисобидаги ғалабаси билан якунланди. Гноҳере Кризодан ташқари иккинчи бўлим аввалида дарвозабон Игнатий Нестеров ўрнига захирадан майдонга тушган посбон Маъмур Икромов пенальтидан гол киритди. «Олмалиқ» сафида ҳимоячи Диёрбек Туропов битта жавоб тўпини киритди.
«Локомотив» кўригида бўлиб турган яна бир африкалик футболчи – 23 ёшли марказий ҳимоячи Моҳамед Гнонтча Коне мазкур ўйинда тўлиқ ўйнади.
«Агар Коне ҳамда Кризонинг ҳаракатлари мураббийларга маъқул келса, улар жамоамизнинг навбатдаги йиғинларига ҳам таклиф этилади», – дейилган эди «Локомотив»нинг 27 декабрь куни чоп этилган мақоласида.
ЎРТОҚЛИК УЧРАШУВИ.
28 декабрь.
"Локомотив" - "Олмалиқ" 3:1 (1:0)
Голлар: Гноҳере Кризо (14, 51), Маъмур Икромов (62, пен.) - Диёрбек Туропов (53)
