Бекободнинг «Металлург» клуби олий лиганинг барча иштирокчилари қатори янги мавсумга қаратилган тайёргарликни давом эттирмоқда. Бир неча йилдан буён анча барқарор ўйин намойиш этаётган жамоа аввалги мавсумни 7-ўринда якунлади. Бекободликларнинг кучли бешликка киришлари учун бор-йўғи битта ғалаба камлик қилди. Бунга Рустам Мирсодиқов шогирдларининг иккинчи даврада ўйинни бироз бўшаштиришгани сабаб бўлди. Муҳими, тажрибали мураббийнинг «Металлург»да кўпдан буён ишлаётгани умумий натижалар ижобий кўриниш олишини таъминлаяпти. Қолаверса, жамоа ҳужумчиси Зоҳид Абдуллаев тўпурарлар пойгасида 2-ўринни эгаллади. Клуб бошлиғи Шавкат Саидовнинг биз билан суҳбат чоғи таъкидлашича, бекободликлар янги мавсумга янада жиддий режалар тузишган.
- Шавкат ака, мана, янги мавсум тақвими тайёр, яъни жамоалар дастлабки турларда кимларга қарши ўйнашларини билишади. Табиийки, энди тайёргарлик жараёнида тақвимга ҳам эътибор қаратилади. Келинг, суҳбатимиз аввалида қуръа жамоангиз учун қандай келгани ҳақида гаплашсак...
- Умуман олганда, ҳар қандай ҳолатда мавсум давомида барча иштирокчилар билан «уй-сафар» тизимида ўйнашимиз керак. Энг ёқимли ҳолат шуки, янги мавсумни ўз майдонимиздаги ўйин билан бошлаймиз. Аниқроғи, бир йиллик танаффусдан сўнг олий лигага қайтган «Динамо»ни қабул қиламиз. Мавсумнинг очилиш учрашувини ўз мухлисларингиз гувоҳлигида ўтказиш, уларга хурсандчилик онларини тақдим этиш ёқимли. 2-турда эса «Машъал» меҳмони бўламиз. Кейин амалдаги чемпион - «Локомотив»га қарши майдонга тушамиз. Хуллас, шу 3та ўйиннинг камида 2тасида ғалаба қозонишимиз шарт.
- Умуман, жамоа раҳбари сифатида «Металлург»нинг аввалги мавсумда қайд этган натижасидан кўнглингиз тўлдими?
- Чемпионат якунлангач, клуб раҳбарияти йиғилиши бўлиб ўтди ва унда 2016 йилги мавсумдан қониқиш ҳосил қилингани айтилди. Энди шу руҳда ишлашда давом этамиз. Хусусан, бўлажак мавсумдан ҳам умидларимиз катта. Ўз ўрнида айтишим керак, 2016 йил ҳисобидан на футболчилар ва на мураббийлардан қарзимиз бор. Яъни ҳисоб-китоб ишлари тўлиқ амалга оширилди. Оддий айтганда, янги мавсумни қарздан холи ҳолда бошлаймиз.
- «Металлург» бир неча йилки, барқарорлиги билан ажралиб турибди. Дейлик, жамоа таркиби унча ўзгармайди. Хўш, бу масалада қандай янгиликлар бор?
- Таркибимиз ўзаги бузилмайди - уни 80-90 фоизга сақлаб қоламиз. Илк ўқув-машғулотлар йиғинида асосий эътибор чигалёзди ва тикланиш машқларига қаратилди. Қайси янги футболчиларни таклиф этиш мураббийлар штабига ҳавола. Бу масалага 15 январгача ойдинлик киритилиши шарт. Чунки ўша пайтга бориб, тайёргарлик кўриш учун вақт оз қолади.
- Етакчи футболчилар билан амалдаги шартномалар муддати узайтириладими?
- Ҳа, албатта. Янги мавсумда ҳам жамоамизда ўйнашни истайдиган футболчилар билан ҳамкорликни давом эттирамиз. Энг катта ютуғимиз - бу жамоамиздаги аҳиллик. Мураббийлар штаби эса алоҳида мавзу. Мана, Рустам ака Мирсодиқов бир неча йилдан буён «Металлург» бош мураббийи лавозимида ишлаб келяпти. Унинг ёрдамчилари ҳам катта тажрибага эгалар. Дейлик, улар футболчилик даврида ҳам ёрқин из қолдиришган. Жамоамиз муваффақиятида айнан мураббийлар хизмати катта, менимча. Ишонаманки, бўлажак мавсумда натижаларимиз янада ижобий бўлади. Асосий мақсадимиз - миллий футболимиз ривожига ўз ҳиссамизни қўшиш. Биринчи галдаги вазифамиз ҳам шу.
- Тўпурарлар пойгасида иккинчи бўлган Зоҳид Абдуллаев янги мавсумда ҳам «Металлург» шарафини ҳимоя қиладими?
- Бу футболчимизни ўз сафида кўришни истайдиган клублар кўп. Лекин у «Металлург»да қолади ва ўйлайманки, жамоамиз ғалабаларига сезиларли ҳисса қўшади.
- «Металлург» аввалги мавсумнинг иккинчи қисмида бироз бўшашгандек кўринди. Буни қандай изоҳлайсиз, янги чемпионатда шунақа бўлмаслиги учун нима қилиш керак?
- Барчасини футболчилар билан обдон таҳлил қилиб чиқдик. Дарҳақиқат, иккинчи даврада ўйинимиз бироз пасайди. Хусусан, «Бухоро»га ютқазганимиз аламли бўлди. Зеро, агар ўша ўйинда ғалаба қозонганимизда, турнир жадвалининг юқорироқ поғонасидан жой олардик.
- Ёшлар жамоасида ўзларини кўрсатиб, асосий таркибда ўйнашга ҳақли эканликларини исботлаган футболчилар ҳам борми?
- Ёшлар жамоамиз мавсумни кўтаринки руҳда ўтказди. Жамоанинг натижасидан хурсандмиз. Бу «Металлург»да ёшлар билан ишлашга алоҳида эътибор қаратилаётганини кўрсатиб турибди. Янги мавсумда ёшлар таркибининг 3-4 нафар аъзоси асосий жамоадан ўрин олишига ишонаман. Улар йиғинларда асосий таркиб вакиллари билан бирга шуғулланишади. Яъни эътиборни тортган йигитларни назорат ўйинларида синаб, энг муносибларини танлаб оламиз.
- Январь ва февраль ойлари учун тайёргарлик режаси тасдиқландими?
- Февралнинг ўрталарига қадар Чирчиқдаги базамизда шуғулланамиз. Табиийки, бу орада назорат учрашувлари ҳам ташкил этилади. Айрим ўйинлар Тошкентда ўтказилади. Шундан сўнг, яъни февралнинг иккинчи ярмида Туркияда йиғин ўтказиш режалаштирилган. Ҳозир бу борада иш олиб бориляпти. Хуллас, ҳаммаси режа асосида кетса, мавсум стартигача битта йиғин хорижда олиб борилади.
