Қишки трансферлар мавсуми бўлишига қарамасдан Европанинг гранд клублари бир қатор муҳим ҳаридларни амалга ошириб улгуришди. Яқиндагина “ПСЖ” ўз сафига Жаҳон чемпиони Дракслерни қўшиб олди. “Манчестер Сити” эса йирик трансферларга қўл уришини кўплаб футбол нашрлари бот-бот такрорлашмоқда.

Одатда, йирик ҳаридларни ёзги трансфер ойида амалга оширишга одатланган гранд жамоалар чемпионатларидаги кучли рақобатлар туфайли январ ойида футбол оламидаги муҳим ҳаридларни амалга ошириш пайида. “Ювентус” жамоаси ҳам бундан мустасно эмасдек. Клуб Пауло Дибала – Гонсало Игуаин дуэтини Алексис Санчес билан тўлдириб, шиддатли ҳужум учлигига айлантирмоқчи. Бу трансферни амалга ошириш учун эса жамоа футболчининг трансферига Миралем Пьянични ҳам киритмоқчи.

«Арсенал» билан амалдаги шартномаси тугашига бир ярим йил қолганида Алексис Санчес трансфер бозоридаги талабгор футболчига айланди. Унинг тўпчилар сафида кўрсатаётган ажойиб ўйинлари бунга сабаб бўлмоқда. Алексиснинг трансферига жиддий қизиқиш билдираётган клуб фақатгина “Ювентус” эмас. Чилилик футболчини “ПСЖ», “Манчестер Сити” ва “Челси” жамоалари ҳам ўз сафида кўришни истамоқда.

Лондонликларнинг етакчиларидан бири бўлган Алексис Италияда яна ўз кучини синаб кўриши мумкин. “Барселона”га кўчиб ўтишдан олдин 2008-2011-йиллар оралигъида «Удинезе» сафидаги кўрсатган ўйинлари мухлисларнинг йодида.

Туттоспорт нашрига кўра, туринликлар Алексисни олиб келиш учун трансферга Миралем Пьянични ҳам қўшмоқчи. Ўтган мавсумда “Рома”дан келиб қўшилган босниялик футболчига “Арсенал” жамоаси ҳам қизиқишган эди. Ўз навбатида “кекса синёра”нинг спорт директори Жузеппе Маротта босниялик футболчини жамоада олиб қолиш истагида.