UzReport қошида «Футбол-ТВ» телеканали очилиши мумкинлиги маълум қилинганди. Буни телеканалнинг расмий сайти расман тасдиқлади.

Юртимиздаги миллионлаб футбол мухлисларининг талаб ва истакларини инобатга олиб ҳамда уларнинг футболга бўлган катта қизиқишларидан келиб чиққан ҳолда UzReport футболга ихтисослашган янги — «Футбол-ТВ» телеканалини ташкил этди, деб ёзилган телеканал хабарида. Ўзбекистон Вазирлар Маҳкамаси ҳузуридаги идоралараро мувофиқлаштирувчи кенгаш йиғилишида «Футбол-ТВ» телеканалига лицензия бериш тўғрисида қарор қабул қилинган.

UzReport телеканали Европа Чемпионлар лигаси, Европа лигаси, Англия Премьер-лигаси ва Испания Ла лигаси ўйинларини Ўзбекистонда трансляция қилишнинг эксклюзив ҳуқуқини харид қилганди. «Футбол-ТВ» ишга тушганидан сўнг UzReport’да футбол ўйинлари трансляцияси тўхтаб қолмайди. Турли чемпионатларда бир вақтда бошланадиган қизиқарли учрашувлардан бири фақатгина футболга ихтисослашган телеканалда намойиш этилса, иккинчи ўйин UzReport’да параллел — жонли эфирда кўрсатилади. Кейинроқ ўша беллашувлар «Футбол-ТВ»да такроран намойиш қилинади.

Телеканалда футболга оид турли қизиқарли кўрсатувларни эфирга узатиб бориш ҳам кўзда тутилган.

Ҳозирда «Футбол-ТВ» телеканалининг лицензиясини расмийлаштириш, техник ва ташкилий ишлар доирасидаги чора-тадбирлар амалга оширилмоқда. UzReport телеканали жамоаси юмушлар якунига етиши билан «Футбол-ТВ»ни ишга туширади ва сиз азиз футбол ишқибозларига миллионлар ўйинидан янада кўпроқ баҳра олиш имкониятини тақдим этади, деб хабарга якун ясалган.

Маълумот учун, «Футбол-ТВ» бутун Ўзбекистон бўйлаб намойиш этилади. Унинг фаолияти шу йилнинг март ойида бошланиши режалаштирилган.