Australian open—2017 ни ўзбекистонлик теннис мухлислари Денис Истоминнинг мардонавор юриши билан эслаб қоладиган бўлди. Умуман бу турнир ўзининг кутилмаган натижалари билан ҳам ёдда қолади.
«Sports.ru» маълумотига кўра, 1968 йилдан буён илк бор «Катта дубулға» туркумига кирувчи мусобақаларнинг яккаликдаги финалчилари 30 ёшдан ошган спортчиларни ташкил қилди. 30 ёшли Рафаель Надаль ўзидан беш ёш кичик бўлган Григор Димитровни турнирдан чиқариб юборгач, сал кам ярим асрдан буён кузатилмаган воқеа нафақат такрорланди, балки спортчиларнинг умумий ёши борасида рекордга ҳам айланиб кетди.
Надалга қарши ҳал қилувчи ўйинда кортга тушадиган Рожер Федерер 35 баҳорни қарши олган. Аёллар ўртасидаги финал беллашувларида иштирок этадиган опа-сингил Уильямсларнинг ёши Федерерникидан кам эмас. Сингил Серена Федерер каби 35 ёшда бўлса, Винус 36 ёшга қадам қўйган.
Маълумот учун, мазкур тўрт ракетка устаси «Катта дубулға» туркумига кирувчи тўрт мусобақада умумий ҳисобда 60 бор чемпионликни қўлга киритган. Бу ҳам финалларда рақобат ҳосил қилган жуфтликлар орасидаги энг яхши кўрсаткичдир.
