"Реал" Испания кубогини  тарк этганидан кейин бор эътиборларини Ла лигага қаратишлари тайин эди. Боз устига, ушбу турда жамоанинг асосий таъқибчилари очко йўқотишгани боис, мадридликлар орадаги фарқни ошириб олиш имкониятига эга эдилар. "Қироллик клуби" бу имкониятдан самарали фойдаланди.

Сакристан бошқарувидаги "Реал Сосьедад" клуби тўпни назорат қилиб, мезбонларни тўпсиз югуришга мажбур қилишди. Аммо улар бу ишни бехато амалга ошира олишмади. Юзага келган хатолардан эса мадридликлар ўта самарали фойдаланишди.

Биринчи бўлимнинг 38-дақиқасида Роналдунинг узатмасидан кейин Ковачич дарвозабон билан яккама-якка вазиятга чиқиб ва дарвозани ишғол қилди.

Иккинчи бўлим бошида хорватиялик футболчи Криштиануга ўз "қарзи"ни қайтарди. Матеонинг узатмасидан португалиялик футболчи жарима майдончасига ёриб кирди ҳамда тўпни дарвозабоннинг устидан ошириб қўйди — 2:0.

Ушбу гол амалда ўйин тақдирини ҳал қилди. Боз устига, ўйин тугашига 15 дақиқа қолганида "Сосьедад" ҳимоячиси Мартинес иккинчи сариқ карточка туфайли майдонни эрта тарк этди.

Бугун ўйини қовушмаган Бенземанинг ўрнига туширилган Мората майдонни голсиз тарк этмади. Васкеснинг узатмасидан кейин Альваро бош билан рақиб дарвозасига учинчи голни уришга муваффақ бўлди.

Ушбу ғалабадан кейин "Мадрид" ўз таъқибчилари — "Барселона" ва "Севилья"дан 4 очкога илгарилаб кетди. Зидан жамоаси ҳисобида битта захира ўйини борлигини яхши биласиз.

Испания Ла лигаси, 20-тур
"РЕАЛ МАДРИД" - "РЕАЛ СОСЬЕДАД" - 3:0 (1:0)
Голлар: 1:0 – 38 Ковачич, 2:0 – 51 Роналду, 3:0 – 82 Мората.
Реал Мадрид – Навас, Варан, Начо, Данило, Рамос, Ковачич (Иско, 77), Каземиро, Кроос, Васкес (Асенсио, 84), Роналду, Бензема (Мората, 66).
Реал Сосьедад – Рульи, Мартинес, Навас, Сальдуа, Сурутуса, Родригес, Каналес (Гранеро, 77), Ильярраменди, Ойарсабаль (Вела, 57), Хуанми, Виллиан Жозе (Прието, 57).
Огоҳлантиришлар: Мартинес (6), Кроос (39), Родригес (71), Васкес (77).
Четлатиш: Мартинес (74).