"Real" Ispaniya kubogini  tark etganidan keyin bor e’tiborlarini La ligaga qaratishlari tayin edi. Boz ustiga, ushbu turda jamoaning asosiy ta’qibchilari ochko yo‘qotishgani bois, madridliklar oradagi farqni oshirib olish imkoniyatiga ega edilar. "Qirollik klubi" bu imkoniyatdan samarali foydalandi.

Sakristan boshqaruvidagi "Real Sosyedad" klubi to‘pni nazorat qilib, mezbonlarni to‘psiz yugurishga majbur qilishdi. Ammo ular bu ishni bexato amalga oshira olishmadi. Yuzaga kelgan xatolardan esa madridliklar o‘ta samarali foydalanishdi.

Birinchi bo‘limning 38-daqiqasida Ronalduning uzatmasidan keyin Kovachich darvozabon bilan yakkama-yakka vaziyatga chiqib va darvozani ishg‘ol qildi.

Ikkinchi bo‘lim boshida xorvatiyalik futbolchi Krishtianuga o‘z "qarzi"ni qaytardi. Mateoning uzatmasidan portugaliyalik futbolchi jarima maydonchasiga yorib kirdi hamda to‘pni darvozabonning ustidan oshirib qo‘ydi — 2:0.

Ushbu gol amalda o‘yin taqdirini hal qildi. Boz ustiga, o‘yin tugashiga 15 daqiqa qolganida "Sosyedad" himoyachisi Martines ikkinchi sariq kartochka tufayli maydonni erta tark etdi.

Bugun o‘yini qovushmagan Benzemaning o‘rniga tushirilgan Morata maydonni golsiz tark etmadi. Vaskesning uzatmasidan keyin Alvaro bosh bilan raqib darvozasiga uchinchi golni urishga muvaffaq bo‘ldi.

Ushbu g‘alabadan keyin "Madrid" o‘z ta’qibchilari — "Barselona" va "Sevilya"dan 4 ochkoga ilgarilab ketdi. Zidan jamoasi hisobida bitta zaxira o‘yini borligini yaxshi bilasiz.

Ispaniya La ligasi, 20-tur
"REAL MADRID" - "REAL SOSYEDAD" - 3:0 (1:0)
Gollar: 1:0 – 38 Kovachich, 2:0 – 51 Ronaldu, 3:0 – 82 Morata.
Real Madrid – Navas, Varan, Nacho, Danilo, Ramos, Kovachich (Isko, 77), Kazemiro, Kroos, Vaskes (Asensio, 84), Ronaldu, Benzema (Morata, 66).
Real Sosyedad – Ruli, Martines, Navas, Saldua, Surutusa, Rodriges, Kanales (Granero, 77), Ilyarramendi, Oyarsabal (Vela, 57), Xuanmi, Villian Joze (Priyeto, 57).
Ogohlantirishlar: Martines (6), Kroos (39), Rodriges (71), Vaskes (77).
Chetlatish: Martines (74).