Ўзбекистоннинг биринчи рақамли ракеткаси Денис Истомин ATP рейтингида яна уч поғона юқорилашга эришди. Бунга унинг Дэвис кубогидаги муваффақиятли юриши сабаб бўлди.
Australian open—2017 даги муносиб иштирокидан кейин Истомин каттагина ўсишга эришиб, юзталикка кириб олган ва 80-ўриндан жой эгаллаганди. Бир ҳафта ичида унинг натижаси 77-ўринга қадар яхшиланди.
Истомин Дэвис кубогида Ўзбекистон терма жамоасини навбатдаги босқичга олиб чиққан 3 очкони олиб беришга муваффақ бўлди. Жанубий Кореяга қарши тўқнашувлар Санжар Файзиевнинг мағлубияти билан бошланган бўлса-да, кейинроқ Истомин кетма-кет икки рақибдан устун келди. Жуфтликда эса ўша Санжар Файзиев билан тандем ҳосил қилиб, яна бир ғалабани қўлга киритди.
Санжар Файзиевнинг ўзи ATP рейтингида тўрт поғона шўнғиб, 371-ўринга келиб жойлашди.
Теннисчилар рейтингининг дастлабки ўнталигида ўзгариш йўқ. Унда британиялик Энди Марри пешқадамлик қилаётган бўлса, Истоминга имкониятни бой бериб Австралия очиқ чемпионатидан чиқиб кетган Новак Жокович 2-ўриндан жой олган. Кейинги поғоналардан Стан Вавринка (Швейцария), Милош Раонич (Канада), Кеи Нисикори (Япония), Рафаэль Надаль (Испания), Марин Чилич (Хорватия), Доминик Тим (Австрия), Гаэль Монфис (Франция) ҳамда Рожер Федерер (Швейцария) каби ракетка усталари жой олган.
