«Фарғона ҳокими кубоги-2017» турнирининг гуруҳ баҳслари якунига етгач «Андижон» мураббийлари футболчиларга қисқа муддатли дам берганди.

Куни-кеча жамоа аъзолари навбатдаги йиғинни Тошкентда давом эттириш учун пойтахт томон йўл олди. Кўпинча ҳар йили қишда жамоа учун вақтинчалик база вазифасини ўтаб берадиган «Admiral» меҳмонхонаси яна «Андижон» ихтиёрида эканлигини айтиб ўтиш лозим.

Кеча жамоа аъзолари режага мувофиқ тиббий кўрикдан ўтказилди. Таркибга икки нафар ўйинчи келиб қўшилганини маълум қиламиз. Булар - дарвозабон Азизбек Абубакиров ва ҳимоячи Абдурасул Комиловдир.

Абубакиров «УзТонгХонгКо» (завод жамоаси) посбони ҳисобланиб январь ойида жамоа йиғинида иштирок этганди. Мураббийлар уни пойтахтдаги йиғинга ҳам таклиф этишди. Ҳимоячи Комиловни эса андижонлик мухлислар яхши билади у сўнгги йилларда биринчи лига иштирокчиси «УзДонгЖу» шарафини ҳимоя қилиб келаётганди. Эндиликда Абдурасул вилоятнинг бош жамоаси учун ўйнайди.

Бундан ташқари яқин кунлар ичида яна бошқа футболчилар ҳам келиб қўшилиши кутилмоқда.
Бунгача жамоа кўригида бўлган ярим ҳимоячи Шукур Жумабоев «Андижон» лагерини тарк этди.

Машғулотлар одатдагидек кунига икки маҳалдан ўтказилмоқда. Эрталабки машғулотлар тренажёр залида ўтаётган бўлса тушликдан кейинги машғулотлар ҳозирча «Дўрмон» стадионида олиб борилмоқда.

11 февраль куни «Андижон» пойтахт йиғинидаги илк назорат учрашувини ўтказади. Спарринг рақиб «Бунёдкор» жамоаси бўлади.