«Ювентус» клубининг собиқ ҳимоячиси Мартин Касерес фаолиятини Испанияда давом эттириши мумкин.
«Барселона» клуби футболчининг хизматига қизиқмоқда ва яқин орада бу борада музокара бошламоқчи, деб хабар беради Tuttomercatoweb. Ҳимоячи Алейш Видалнинг жароҳат олиши ва 5 ойга сафдан чиқиши натижасида, «Барселона» 29 ёшли Касерес билан шартнома имзолаши мумкин.
Касерес 2016 йилдан буён эркин агент мақомида юрибди. Январь ойида у «Милан» ва «Бешиктош» билан музокара ўтказганди, аммо томонлар шартнома борасида келишувга эришмади.
