«Ювентус» бош мураббийи Массимилиано Аллегри ва ҳимоячи Леонардо Бонуччи ўртасидаги можаронинг янги тафсилотлари аниқ бўлди.

Мураббий футболчи билан "сан-ман"га борганидан кейин, агар Бонуччи жазога тортилмайдиган бўлса, Аллегри жамоани тарк этиши мумкинлиги билан клуб раҳбариятига таҳдид солди. Дастлаб "Ювентус" раҳбарияти мазкур можаро туфайли ҳам мураббий, ҳам ҳимоячини жаримага тортмоқчи эди, аммо мутахассиснинг таҳдидидан кейин мураббийни жазоламасликка қарор қилди.

"La Gazzetta dello Sport" тарқатган хабарга кўра, «Палермо»га қарши ўйиндан кейин Аллегри ва Бонуччи қаттиқ уришиб қолишган. Қолган футболчилар уларни ажратиб қўйишларига тўғри келган. Кейинчалик эса клуб раҳбарияти билан суҳбат чоғида ҳам жанжал давом этган.

Эслатиб ўтамиз, Бонуччи Чемпионлар лигаси доирасида «Порту»га қарши ўйинда майдонга туширилмади.