Деярли 10 йилдан буён жаҳон футболи чўққиларидан бирини эгаллаб турган аргентиналик ҳужумчи Лионел Месси ушбу мавсумда ҳам ҳайратланарли кўрсаткичларни қайд етмоқда. «Барселона» айнан беш карра «Олтин тўп» соҳибининг хизматлари эвазига қатор ўйинларда муваффақиятга эриша олди.

Испаниянинг Марcа нашри томонидан эълон қилинган статистика эса Чемпионлар лигаси нимчоракфинали дастлабки ўйинида «Барса»ни 4:0 ҳисобида мағлуб этган «ПСЖ»га ҳам хотиржамликка берилмасликни яна бир бор эслатиши турган гап. Зеро, Месси ушбу мавсумда «Барселона» томонидан барча мусобақаларда урилган голларнинг деярли ярмида иштирок етган.

«Кўк-анорранглилар» 2016/2017 йилги мавсумда барча мусобақаларда ҳозиргача жами 122 та гол уришга эришган бўлиб, Месси уларнинг 42,8 фоизида иштирок этган: аргентиналик ҳужумчи жамоасининг 37 та ўйинида қатнашиб 38 та гол урган ва 13 та голга ҳаммуаллифлик қилган. Жумладан, «Селта»га қарши ўйинда 2 та гол уриб, яна 2 та голга ассистентлик қилди.

Шунингдек, Месси Ла Лигада ҳам гол урган, ҳам ассистентлик қилган ўйинлар сони бўйича ҳам етакчилик қилмоқда. Аргентиналик ҳужумчи бу ишни тўққизта ўйинда уддалаган бўлса, иккинчи ўриндаги жамоадоши Луис Суарес ва «Селта» ҳужумчиси Яго Аспасда бу кўрсаткич 7 тадан ўйинга тенг. Эътиборлиси, ушбу мавсумда «Реал»нинг фақатгина бир футболчиси бу ишни уддалаган: Карим Бензема.

Албатта, бу «Барселона» Мессига тўла боғлиқ эканлигини англатмайди. Айниқса, Луис Суареснинг барқарор тўпурарлиги ва Неймарнинг сўнгги пайтларда очилиб бораётган ўйинини, шунингдек Луис Энрике томонидан қўлланилаётган янги тактик юришлар муваффақиятини ҳам унутмаслик лозим.

Шундай экан, гарчи УЕФА томонидан «Барселона»нинг Чемпионлар лигасида кейинги босқичга ўтиш имкониятлари 0%га баҳоланган бўлса-да, «кўк-анорранглилар» бу баҳо нотўғри еканлигини исоботлашга ҳаракат қилиб кўради. Демак, мухлисларни яна бир ўта қизиқарли баҳс кутиб турибди.