Футбол бўйича Ўзбекистон Олий лигасининг 2-тури доирасида бугун — 9 март куни икки учрашув бўлиб ўтади. Ўтган мавсумни кучли тўртликда якунлаган «Насаф» ва «Бухоро» клублари Қаршида тўқнаш келса, Осиё Чемпионлар лигаси йўлланмаси учун кураш олиб бораётган «Олмалиқ» ўз майдонида шу турнирда қатнашаётган «Бунёдкор»ни қабул қилади.

МТРКнинг «Спорт» телеканали «Олмалиқ» — «Бунёдкор» ўйинини тўғридан-тўғри трансляция қилишни режалаштирганди. Бироқ номаълум сабабларга кўра телеканал ўз режаларига ўзгартириш киритди ва ўйинни 00:05 да кўрсатишга қарор қилди.

Маълумот учун, бу вақтда UzReport Европа лигасидан жой олган ўйинларни жонли намойиш қилаётган бўлади. «Спорт» 8 март кунги «Динамо» — «Шўртан» ўйинини ҳам «Барселона» — «ПСЖ» учрашуви билан кесишган ҳолатда режага киритганди.

Бугунги ўйинлардан Қаршидагиси 16:00 да, Олмалиқдагиси эса 17:30 да старт олади. Кеча 2-турнинг 3 та учрашуви бўлиб ўтганди.