Олий лиганинг 3-турида "Пахтакор" ўз майдонида Биринчи лигадан энди Олий лигага чиққан "Динамо"ни қабул қилди. Учрашув сенсацион натижа билан якунланди.

Самарқандликлар бутун ўйин давомида ишончли ҳимояланишди. Имкон бўлган пайтда эса ҳужумга ўтиб  туришди. Майдон эгалари баҳс мобайнида бир нечта қулай имкониятларга эга бўлиб, улардан фойдалана олишмади.

Ўйин тугашига 2 дақиқа қолганида "Динамо" ўнг қанотдан жарима тўпини ўйинга киритди. Шоҳрух Холматов бош билан "Пахтакор" дарвозасини ишғол қилди.

Қўшиб берилган дақиқаларда Сергеев жамоасини мағлубиятдан қутқариб қолиши мумкин эди. Унинг бош билан берган зарбасидан кейин бўш дарвозага кираётган тўпни ҳимоячи бош билан қайтариб қолишга муваффақ бўлди.

Шу тариқа, "Динамо" дастлабки 3та турдан сўнг 100 фоизли натижа қайд этган ҳолда, мусобақа жадвалида карвонбошилик қилишда давом этмоқда. Самарқандликлар ҳали ўз дарвозаларидан ўтказиб юборишмагани эътиборга молик.

"Пахтакор" эса 3та ўйиндан кейин 4 очкога эга бўлиб турибди.

Олий лига, 3-тур
"ПАХТАКОР" - "ДИНАМО" 0:1
ГОЛ: Шоҳрух Холматов (88)
"Пахтакор": Эргашев, Козак, Ораховац, Булят, Ҳошимов, Исматуллаев, А.Аҳмедов, Андреев, Нуруллаев, Искандеров, Сергеев (с)
"Динамо": Наумов, Локаев, Б.Исроилов, Бозоров (с), Азимов, Сулаймонов, Қаҳрамонов, Холматов, Низомов, Мамажонов, А.Исроилов
Ҳакамлар: Олим Толибжонов (Тошкент), Бектурсин Канназаров (Нукус), Жалгасбой Сарсенов (Нукус).
Назоратчи: Олег Дачев (Тошкент).