Oliy liganing 3-turida "Paxtakor" o‘z maydonida Birinchi ligadan endi Oliy ligaga chiqqan "Dinamo"ni qabul qildi. Uchrashuv sensasion natija bilan yakunlandi.

Samarqandliklar butun o‘yin davomida ishonchli himoyalanishdi. Imkon bo‘lgan paytda esa hujumga o‘tib  turishdi. Maydon egalari bahs mobaynida bir nechta qulay imkoniyatlarga ega bo‘lib, ulardan foydalana olishmadi.

O‘yin tugashiga 2 daqiqa qolganida "Dinamo" o‘ng qanotdan jarima to‘pini o‘yinga kiritdi. Shohrux Xolmatov bosh bilan "Paxtakor" darvozasini ishg‘ol qildi.

Qo‘shib berilgan daqiqalarda Sergeev jamoasini mag‘lubiyatdan qutqarib qolishi mumkin edi. Uning bosh bilan bergan zarbasidan keyin bo‘sh darvozaga kirayotgan to‘pni himoyachi bosh bilan qaytarib qolishga muvaffaq bo‘ldi.

Shu tariqa, "Dinamo" dastlabki 3ta turdan so‘ng 100 foizli natija qayd etgan holda, musobaqa jadvalida karvonboshilik qilishda davom etmoqda. Samarqandliklar hali o‘z darvozalaridan o‘tkazib yuborishmagani e’tiborga molik.

"Paxtakor" esa 3ta o‘yindan keyin 4 ochkoga ega bo‘lib turibdi.

Oliy liga, 3-tur
"PAXTAKOR" - "DINAMO" 0:1
GOL: Shohrux Xolmatov (88)
"Paxtakor": Ergashev, Kozak, Oraxovas, Bulyat, Hoshimov, Ismatullayev, A.Ahmedov, Andreev, Nurullayev, Iskanderov, Sergeev (s)
"Dinamo": Naumov, Lokayev, B.Isroilov, Bozorov (s), Azimov, Sulaymonov, Qahramonov, Xolmatov, Nizomov, Mamajonov, A.Isroilov
Hakamlar: Olim Tolibjonov (Toshkent), Bektursin Kannazarov (Nukus), Jalgasboy Sarsenov (Nukus).
Nazoratchi: Oleg Dachev (Toshkent).