Бутунжаҳон бокс сериясининг (WSB) VII мавсум «C» гуруҳи 4-тури доирасида Ўзбекистоннинг Uzbek Tigers жамоаси Тошкентдаги «Ўзбекистон» спорт мажмуасида Хитойнинг China Dragons боксчиларига қарши баҳс олиб бормоқда.
Навбатдаги жангда – 60 килограммга вазндаги боксчилар баҳс олиб борди. Рио–2016 Олимпия ўйинлари совриндори Муроджон Аҳмадалиев хитойлик Сен Вангга қарши жанг қилиб, 3:0 ҳисобида зафар қучди. Учинчи раундда ўзбекистонлик боксчи рақибини нокдаунга учратишга муваффақ бўлди.
Таъкидлаш жоиз, Муроджон Аҳмадалиев 18 февраль куни Astana Arlans’га қарши беллашувда Қозоғистон вакили Зокир Сафиуллинга 0:3 ҳисобида ютқазиб қўйганди. Бугун Рио–2016 совриндори аввалги хатосини тўғрилашга эришди.
Аввалроқ -52 килограмм вазн тоифасида Аброржон Қодиров ишончли тарзда Ёнг Чангни мағлубиятга учратгани ҳақида маълум қилинганди.
Мазкур беллашувдан кейин Uzbek Tigers ҳисобни оширди – 2:0. Навбатдаги жанглар қуйидаги кўринишни олган:
-69 килограмм: Шаҳрам Ғиёсов – Вей Лиу;
-81 килограмм: Бектемир Мелиқўзиев – Жиабин Хуанг;
+91 килограмм: Баҳодир Жалолов – Хайпенг Му.
Эслатиб ўтамиз, WSB доирасида Uzbek Tigers 2017 йил ҳисобидан учта жанг ўтказди. Ўзбекистонлик боксчилар аввалига Хитойда China Dragons’дан 2:3 ҳисобида енгилган бўлса, кейинроқ Қозоғистонда Astana Arlans’га 1:4 ҳисобида имкониятни бой берганди. Тошкентда бўлиб ўтган 3-турда Uzbek Tigers Россиянинг Patriot Boxing Team жамоасини 5:0 ҳисобида таслим қилганди.
