АҚШнинг Индиана-Уэллс шаҳрида бўлиб ўтган "BNP Paribas Open - 2017" турнирининг бош соврини швейцариялик машҳур теннисчиси Рожер Федерерга насиб этди.
Мукофот жамғармаси 7 913 405 АҚШ долларини ташкил этган мазкур турнир финалида Федерер ўз ҳамюрти Станислас Вавринкани 2 сетда (6:4, 7:5) мағлуб этди. Сўнгги сетда Федерер 5та брейк пойнтнинг 3тасидан унумли фойдаланиб, ўз фаолиятида бешинчи маротаба ушбу турнир бош совринини қўлга киритди.
Бу билан Рожер Федерер "Мастерс" туркумидаги турнирда ғолиб чиққан ёши энг катта теннисчи бўлди. У совринни қўлга киритган пайтда 35 ёшу етти ойлик эди. Бу соврин Федерер учун фаолиятидаги тўқсонинчиси бўлди.
Аввалги рекорд америкалик Андре Агассига тегишли бўлиб, у 2004 йили "Мастерс" туркумига кирувчи Цинциннатидаги турнирни 34 ёшу уч ойлигида ютган эди.
Федерер мазкур ғалаба эвазига 1000та рейтинг очкосини ҳам қўлга киритди ва АТП рейтинг жадвалида 6-поғонага кўтарилиб олди.
