AQSHning Indiana-Uells shahrida bo‘lib o‘tgan "BNP Paribas Open - 2017" turnirining bosh sovrini shveysariyalik mashhur tennischisi Rojer Federerga nasib etdi.
Mukofot jamg‘armasi 7 913 405 AQSH dollarini tashkil etgan mazkur turnir finalida Federer o‘z hamyurti Stanislas Vavrinkani 2 setda (6:4, 7:5) mag‘lub etdi. So‘nggi setda Federer 5ta breyk poyntning 3tasidan unumli foydalanib, o‘z faoliyatida beshinchi marotaba ushbu turnir bosh sovrinini qo‘lga kiritdi.
Bu bilan Rojer Federer "Masters" turkumidagi turnirda g‘olib chiqqan yoshi eng katta tennischi bo‘ldi. U sovrinni qo‘lga kiritgan paytda 35 yoshu yetti oylik edi. Bu sovrin Federer uchun faoliyatidagi to‘qsoninchisi bo‘ldi.
Avvalgi rekord amerikalik Andre Agassiga tegishli bo‘lib, u 2004 yili "Masters" turkumiga kiruvchi Sinsinnatidagi turnirni 34 yoshu uch oyligida yutgan edi.
Federer mazkur g‘alaba evaziga 1000ta reyting ochkosini ham qo‘lga kiritdi va ATP reyting jadvalida 6-pog‘onaga ko‘tarilib oldi.
