«Манчестер Юнайтед»нинг собиқ бош мураббийи Алекс Фергюсон яна жамоани бошқарадиган бўлди.
Мутахассис клуб фахрийси Майкл Кэррикка бағишланадиган учрашувда жамоани бош мураббий сифатида майдонга олиб тушади. Унда «Манчестер Юнайтед»нинг 2008 йилдаги таркиби юлдузлар терма жамоасига қарши ўйнайди.
«МЮ» таркиби Кэррикка 9 йил олдин жамоадош бўлган футболчилардан иборат бўлади. Юлдузлар термаси эса Фрэнк Лэмпард, Стивен Жеррард, Майкл Оуэн ва бошқа фахрий футболчилардан таркиб топади ҳамда бу жамоани Ҳарри Реднапп бошқаради.
Учрашув шу йилнинг 4 июнь кунида «Олд Траффорд» стадионида ўтказилиш белгиланган. Эслатиб ўтамиз, Фергюсон «Манчестер Юнайтед»ни 1986 йилдан 2013 йилгача бошқарган ва 38та соврин ютган.
