Белоруслик ҳимоячи Владислав Косминин ушбу мавсумда "Олмалиқ" шарафини ҳимоя қилмоқда. У нима учун фаолиятини Ўзбекистонда давом эттиришга қарор қилгани ҳақида ўз фикрларини билдириб ўтди.

– Мавсум якунланганидан кейин агентим менга қўнғироқ қилди ва хориж чемпионатларидан бир нечта вариантларини таклиф қилди. Учта яхши вариант бор эди: «Факел» (Россия), «Арка» (Польша), «Олмалиқ» (Ўзбекистон). Дастлабки таклиф Ўзбекистон клуби раҳбариятидан тушганди, аммо мен уларга жавоб беришга шошилмадим. Боиси, менга кўпроқ Россия ва Польша вариантлари қизиқроқ туюлганди. Аммо улардан аниқ таклиф тушмади. Шу боис, кўрикдан ўтиш учун Ўзбекистонга йўл олдим. "Олмалиқ" сафида бир ҳафта шуғулланиб, назорат ўйинида иштирок этдим. Мураббий менинг ўйинимдан қониқиш ҳосил қилди ва менга шартнома таклиф қилди. Ўйлаб кўриш учун вақт олдим ва кейинчалик шартномага имзо чекдим.

— Қайси омиллар сизни ўзига жалб қилди?
— Биринчи навбатда, албатта, бу мураббий. Виктор Кумиков – тажрибали мутахассис. У Қозоғистоннинг «Шахтёр» клуби билан Европа чемпионлар лигаси мусобақасида яхши натижаларни қайд этди. Шунингдек, яшаш, овқатланиш шароитлари ва стадион менга ёқди. Яширмайман, молиявий жиҳат ҳам аҳамиятга эга бўлди. Сўнгги йилларда мен ўйнаган белорусь клубларида молиявий муаммолар бор эди. Шунинг учун мен Беларусь чемпионатини тарк этишга қарор қилдим. Чемпионатимиз йилдан йилга ўсмасдан, бир жойда турибди.