Ўзбекистон аёллар терма жамоаси Осиё Кубоги–2018 саралаш босқичида иштирок этиш учун бугун, 30 март куни Тошкент вақти билан 15:00да КХДРга учиб кетди.
КХДРга йўл олишдан аввал Ўзбекистон аёллар терма жамоаси Терма жамоалар маркази раҳбарияти билан учрашди.
Шерали Бобоқулов бош мураббийлигидаги жамоа Осиё Кубоги–2018 саралаш босқичи “B” гуруҳидан жой олган бўлиб, финал босқичига чиқиш учун Жанубий Корея, Гонконг, Ҳиндистон ва КХДР аёллар термасига қарши баҳс олиб боради.
Қуйида саралаш босқичида иштирок этадиган футболчилар рўйхати келтирилган.
Дарвозабонлар: Лайло Тилолова, Мафтуна Жонимқулова, Гуландон Бойматова;
Ҳимоячилар: Холида Дадабоева, Камола Рисқиева, Мафтуна Шойимова, Дилрабо Асадова, Нозима Камолтоева;
Ярим ҳимоячилар: Иродахон Турдалиева, Зумратхон Назарова, Умида Зоирова, Малика Бурхонова, Севара Нормуродова, Саида Галимова, Махфуза Туропова, Феруза Турдибоева, Мавлуда Мунавварова, Дилдора Нозимова;
Ҳужумчилар: Нилуфар Қудратова, Людмила Карачик, Лианна Нарбекова, Махлиё Сарикова, Рушания Сафина.
“B” гуруҳи учрашувлари 3–11 апрель кунлари КХДРда бўлиб ўтади. Ўзбекистон аёллар терма жамоасининг ўйин тақвими қуйидагича:
3 апрель. Гонконг – Ўзбекистон
7 апрель. Ўзбекистон – Ҳиндистон
9 апрель. Ўзбекистон – КХДР
11 апрель. Жанубий Корея – Ўзбекистон
Регламентга кўра, фақатгина гуруҳ босқичида зафар қучган терма жамоа Осиё Кубоги–2018 турнирининг финал босқичига йўлланма олади. Ўз гуруҳида ғалаба қозонган терма жамоалар Япония, Австралия, Хитой (Осиё чемпионати–2014 якунига кўра энг юқори рейтингга эга бўлган жамоалар) ҳамда Иордания (турнир мезбони)га қўшилади.
Шу тариқа, 2018 йилнинг 7–22 апрель кунлари бўлиб ўтадиган Осиё чемпионати финал босқичида жами 8 терма жамоа иштирок этади. Финал босқичида энг яхши натижани қайд этиган беш терма жамоа Францияда июнь/июль ойларида бўлиб ўтадиган аёллар ўртасидаги ЖЧ–2019 мусобақасига йўлланма олади.
Маълумот учун, Ўзбекистон аёллар терма жамоаси ФИФА рейтингида 42-ўринда (1548 очко) бормоқда.
