Испания чемпионатининг 29-тури доирасида "Барселона" сафарда "Гранада" меҳмони бўлди. Каталонияликлар сафида Лионель Месси ҳаракат қилмаганига қарамай, Энрике шогирдлари йирик ҳисобда ғалабани тантана қилишди.

Биринчи бўлим қаҳрамони сифатида "Гранада" посбони Гильермо Очоани таъкидлаш лозим. Мексикалик дарвозабон рақибнинг жуда кўплаб хавфли зарбаларини қайтаришга муваффақ бўлди. Шунга қарамай, биринчи бўлим тугаш арафасида Луис Суарес мезбонлар дарвозасини ишғол қилди.

Иккинчи бўлим аввали гранадаликлар учун омадли келди. Захирадан майдонга тушган Жереми Бога дарвозабон яккама-якка вазиятга чиқиб кетиб, ҳисобни тенглаштирди.

"Барселона" яна ҳисобда олдинга чиқиб олиши учун 14 дақиқа керак бўлди. Суареснинг узатмасидан кейин Пако Алкасер дарвозабон билан бирга-бир вазиятга чиқиб бориб, ўз мақсадига эришди.

Сўнгги дақиқаларда "кўк-анорранглилар" рақиб дарвозасига яна 2 марта йўл топишди. Дастлаб Иван Ракитич жарима майдончаси чизиғи устида берган зарба натижасида тўп рекошет ҳолатда тўрга бориб тушди. Қўшиб берилган дақиқаларда Неймар ҳам ўз ҳисобига битта гол ёзишга муваффақ бўлди. Бу бразилиялик футболчининг "Барса" сафидаги юбилей — 100-голи бўлди.

Ушбу ғалабадан кейин "Барселона"нинг очколари сони 56тага етди. Жамоа "Реал"дан 2 очко ортда қолмоқда.

Испания Ла лигаси, 29-тур
ГРАНАДА – БАРСЕЛОНА - 1:4 (0:1, 1:3)
2 апрель, 23.45, «Нуэво Лос Карменес»
Голлар: 0:1 – 44 Суарес, 1:1 – 50 Бога, 1:2 – 64 Пако Алькасер, 1:3 – 83, автогол Сонье, 1:4 – 90 Неймар.
Гранада – Очоа, Ломбан, Сильва (Куэнка, 78), Литри, Сонье, Ангбан (Бога, 46), Агбо, Муборак, Перейра, Фулькье, Кравец (Рамос, 55).
Барселона – тер Штеген, Маскерано, Матье, Альба, Ракитич (Аленья, 87), Сержи Роберто, Андре Гомеш (Иньеста, 67), Бускетс, Рафинья (Пако Алькасер, 17), Неймар, Суарес.
Огоҳлантиришлар: Сержи Роберто (28), Ломбан (59), Альба (60), Ракитич (77), Агбо (79).
Четлатиш: Агбо (82).