Европа кучли бешлик чемпионатларининг катта қисми ортда қолган бир пайтда чемпионлик учун кураш айни авжига чиқмоқда. Испания Ла Лигаси, Германия Бундеслигаси, Англия Премьер Лигаси, Италия А серияси ва Францийа 1 Лигасида ҳозирга келиб мағлубиятга учрамаган жамоа қолмаган, аммо баъзи жамоалар мағлубиятлари камлиги билан муваффақият қозонмоқда. Эътиборингизга шу жамоаларни тақдим этамиз.

Биринчи ўринда ушбу мавсумда ўз миллий чемпионатида атиги бир мағлубиятга учраган «Бавария» бормоқда. Мюнхенликлар Бундеслигада ўтказган 26 ўйинларидан 20 тасида ғалаба қозониб, 5 та дуранг ўйнаган ва 65 очко билан энг яқин таъқибчиси «РБ Лейпсиг»дан 13 очкога олдинлаб кетган.

Иккинчи ўринда иккитадан ўйинда ютқазган уч жамоа бормоқда – «Хоффенхайм», «Реал», ва «Ницца». Испания Ла Лигаси пешқадами «Реал» 2017-йилга келибгина мағлубиятга учраган бўлса, Бундеслигада учинчи ўринда бораётган «Хоффенхайм» кучли бешликда мағлубиятсиз серияси январ охиригача давом этган ягона жамоадир. «Ницца» эса Францийа 1 Лигасида энг кам мағлуб бўлган жамоа эканлигига қарамай учинчи ўринда бормоқда.

Учтадан мағлубиятга учраган жамоалар 4 та: «Барселона», «Тоттенҳем», «Манчестер Юнайтед» ва «Монако». Ла Лигада «Реал»ни изма-из таъқиб қилиб келаётган «Барса»ни «Реал» ҳам, «Атлетико» ҳам, «Севиля» ҳам мағлуб этолмаган – бу ишни «Алавес», «Селта» ва «Депортиво» уддалаган.

Премьер Лигада энг кам ютқазган жамоалар пешқадам «Челси»дан анча узоқда – иккинчи ўриндаги «Тоттенҳем» 7 очко, 5-ўриндаги «Манчестер Юнайтед» 16 очкога ортда бормоқда. Францийада эса «Монако»нинг мағлубиятлари «Нитса»дан битта кўп бўлса ҳам, князлик жамоаси 1 Лигада пешқадамлик қилмоқда.

Тўртта жамоа тўрттадан ўйинда мағлуб бўлган. Бу кўрсаткич «Челси» ва «Ювентус»га мос равишда Премьер Лига ва А серияда яққол пешқадамлик қилишга халақит бермаяпти. «ПСЖ» эса 4 та мағлубият билан 1 Лигада иккинчи поғонани эгаллаб турган бўлса, «Наполи» А серияда учинчи ўринда бормоқда.

Бештадан мағлубият ҳозирча бешта жамоада бор: Премьер Лигада учинчи ўриндаги «Ливерпул» ва тўртинчи ўриндаги «Манчестер Сити»да, Ла Лигада учинчи ўриндаги «Атлетико» ва тўртинчи ўриндаги «Севиля»да ҳамда Бундеслигада тўртинчи ўриндаги Дортмунднинг «Боруссия»сида.

Иккита жамоа олтита мағлубият билан ҳам юқори ўринларда туришни уддаламоқда: «РБ Лейпциг» Бундеслигада, «Рома» эса А серияда иккинчи ўринда бормоқда. Худди шунча мағлубиятга учраган «Лацио» тўртинчи ўринни эгаллаб турган бўлса, 7 тадан мағлубиятга эга «Арсенал», «Вилярреал» ва «Кёлн» ўз чемпионатларида олтинчи, «Фиорентина» эса саккизинчи поғонада бормоқда.