Олий лиганинг 5-турида “Насаф” “Олмалиқ” жамоаси меҳмони бўлади.
Учрашув 7 апрел жума куни Олмалиқ шаҳридаги ОКМК спорт мажмуасида, соат 18:00да бошланади.
Бўлажак учрашув ҳақида
Бўлажак, “Олмалиқ” – “Насаф” учрашуви жуда қизиқарли бўлишини олдиндан тахмин қилиш қийин эмас. Бунга бир қанча сабаблар бор.
"Насаф" бу йилги чемпионатдаги барча ўйинда ғалаба қозонди. Рақиблар дарвозасини 8 марта ишғол қилиб, ўз дарвозасидан 2 марта тўп олиб чиқди. Айни пайтда “аждарлар” турнир жалвалининг 3-поғонасида боришмоқда, жамоа ҳисобида 9 очко бор.
“Олмалиқ” жамоасининг бу йилги чемпионатда омади чопмаяпти. Улар ўтказилган 4 учрашувнинг биттасида дуранг, қолган учтасида мағлубиятга учради. Кончилар 1 очкога эга ва турнир жадвалининг сўнгги поғонасини эгаллаб турибди.
Учрашув ҳакамлари
“Олмалиқ” – “Насаф” учрашувини Бахтиёр Намозов бошқаради. Унга қанотларда Мамур Саидқосимов ва Равиль Шояхметовлар ёрдам беришади. Захира ҳаками сифатида Шавкат Насибуллаев ишлайди. Ҳакамларанинг барчаси Тошкент шаҳридан. Ҳакамлар ишини учрашувда бухоролик Иброҳим Шарипов назорат қилади.
Бахтиёр Намозов ўтган йилги чемпионатда "Насаф" иштирокида учта учрашувда, кубок баҳсларидаги битта учрашувда бош ҳакамлик қилган. Чемпионат баҳсларидаги учрашувларнинг биттасида дуранг, биттасида ғалаба ва биттасида жамоамиз мағлуб бўлган. Кубок баҳсида эса ғалаба қозонган.
Ўзаро учрашувларга оид фактлар
“Олмалиқ” ва “Насаф” жамоалари, илк бор олий лигада 2008 йилги мавсумда куч синашган, у пайтда жамоанинг номи – ОТМК эди. Улар кейинги йилги мавсумдан бошлаб ўз номларини – “Олмалиқ”қа алмаштиришган. Мазкур жамоалар ўртасидаги ўзаро илк учрашув Қаршида бўлган. Бунда кичик 1:0 ҳисобида "Насаф" ғалаба қозонган. Учрашувдаги ягона голни Зафар Холмуродов киритган.
Шу пайтгача мазкур жамоалар ўзаро 18 марта куч синашган. Шундан ўнта баҳсда “аждарлар” зафар қучишган, яна еттита ўйинда дуранг натижа қайд этилган. Битта ўйинда олмалиқлик футболчилар ўз майдонида ғалабага эришган. Тўплар нисбати қуйидагича кўриниш олган – 31:16. Устунлик “Насаф” жамоасида.
Олмалиқда бўлиб ўтган барча учрашувлар:
27.08.2008. “Олмалиқ” – “Насаф” 1:1
29.06.2009. “Олмалиқ” - “Насаф” 0:2
16.05.2010. “Олмалиқ” - “Насаф” 0:0
22.10.2011. “Олмалиқ” - “Насаф” 0:0
03.08.2012. “Олмалиқ” - “Насаф” 0:1
08.11.2013. “Олмалиқ” - “Насаф” 2:2
22.06.2014. “Олмалиқ” - “Насаф” 1:1
23.03.2015. “Олмалиқ” - “Насаф” 2:0.
11.03.2016. “Олмалиқ” – “Насаф” 1:3
Олмалиқда бўлиб ўтган тўққиз ўйиндан бештасида дуранг қайд этилган. Уч учрашувда “Насаф” ғалаба қозонган, битта учрашувда “Олмалиқ” ғолиб бўлган. “Олмалиқ” ўз уйида сўнгги бор 2015 йили ғалаба қозонган.
Мазкур жамоаларнинг ўринбосарлари ўртасидаги баҳс 6 апрел пайшанба куни “Металлург” стадионида бўлиб ўтади. Учрашув соат 15:30да бошланади.
