Англия премьер-лигасининг 30-тури доирасида бўлиб ўтган "Арсенал" ва "Манчестер Сити" жамоалари ўртасидаги ўйиннинг иккинчи бўлимида "канонирлар" сардорсиз ўйнашгани аниқ бўлди.
Биринчи бўлимда "Арсенал"ни сардор сифатида Лоран Косьельни майдонга бошлаб тушди, лекин танаффус пайтида унинг ўрнига Габриэль туширилди. Лондонликларнинг анъанавий сардори ҳисобланган Пер Мертезакер бу баҳсда иштирок этмади. Вице-сардорлар — Петр Чех ва Санти Касорла жароҳат туфайли ўйин қайдномасидан ўрин олишмади. Шу боис, "Арсенал"нинг сардорлик боғичи кийиниш хонасида қолган ва жамоа иккинчи бўлимни сардорсиз ўтказган. Бу эса мусобақа регламентига зид ҳисобланади.
Арсен Венгер вазиятни қуйидагича изоҳлади: "Бу қизиқ савол. Ўйиндан кейин ҳеч ким менга бундай савол бермаганди. Иккинчи бўлимда қайси футболчи сардор бўлганини эслолмайман", – деди Венгер Sky Sports'га берган интервьюсида.
Эслатиб ўтамиз, "Арсенал" – "Манчестер Сити" ўйини 2:2 ҳисобида якунланди.