«Динамо» - «Бухоро» (3:1) учрашувидан кейин «Бухоро» клуби бош мураббийи вазифасини бажарувчи Улуғбек Бақоев журналистлар саволларига жавоб қайтарди.
- Улуғбек ака, аввало бўлиб ўтган ўйинга тўхталсангиз…
- Аввало Самарқанд жамоасини ғалаба билан табриклайман, менимча улар бугун ғалаба қозонишни кўпроқ истадилар. Ўйинда шундай вазиятлар бўлдики, биз улардан фойдалана билмадик, рақибларимиз эса имкониятдан фойдаланиб қолишди. Футбол хатолар ва вазиятлардан фойдаланишдан иборат. Бу борада эса «Динамо» вазиятларни голга айлантира олди. Рақибларни табриклайман.
- Шоҳруҳ Гадоевнинг биринчи бўлимдаёқ алмаштирганингиз нима билан боғлиқ – жароҳат олдими ёки ўйинидан қониқмадингизми?
- Футболда бўладиган ҳолат бу, гоҳида футболчининг ўйини чиқади, гоҳида эса йўқ. Шу боис, мураббийлар штаби билан маслаҳатлашиб, уни майдондан олдик ва ўрнига бошқа футболчи тушди. Бу жароҳат билан боғлиқ эмас.
- Ўйиндан олдин «Динамо» жамоасини ўрганиб чиққан бўлишингиз керак, бу борада нималарни амалга ошира олдингиз, нималарни эса йўқ?
- Албатта, «Динамо»ни ўрганиб чиққан эдик. Чиндан ҳам бу жамоа ҳужумдан ҳимояга жуда тез ва тартибли қайта олади, қарши ҳужумга ҳам жуда тез ўтади. Бугун «Динамо»нинг устунлиги тезкор қарши ҳужумлар ва қанот бўйлаб ўйин бўлди. Бу борада эса биз аксарият вазиятларда рақибни тўхтата олмадик.
- Ўйин давомида ҳакамга кўп эътироз билдирдингиз. Бу шунчаки реакциянгиз эдими ёки чиндан ҳам ҳакамлар хато қилди деб ҳисоблайсизми?
- Футбол азартга бой спорт тури. Футболчи учун ҳам, мураббий учун ҳам. Ўша вазиятларда мен ҳакамларнинг қайсидир қарори учун эътироз билдирганим йўқ, мен фақат ўз футболчиларим ҳаракатларига эътибор қаратгандим. Ҳакамлар ҳаракатини баҳолаш эса менинг вазифамга кирмайди. Уларнинг назоратчилари бор. Ўйин давомида ҳакамларга эътироз билдирганим йўқ.
- «Бухоро» жамоасида барқарорлик кўринмаяпти. Баъзан кучли рақибларни мағлуб этади, баъзан эса кучсиз жамоаларга мағлуб бўлади. Бу нима билан боғлиқ?
- Футбол хатолар ва вазиятлардан иборат. Бунда аниқ бир сабаб йўқ. Вазиятлардан фойдалансак ғалаба қозонамиз, фойдалана олмасак рақиб ғалаба қозонади.
