Бухоро шаҳридаги “Дилкушо” кортларида теннис бўйича “Фьючерс” туркумига кирувчи турнир давом этмоқда.
Бугун соврин жамғармаси 25 000 АҚШ долларини ташкил қилувчи ушбу мусобақанинг сўнгги саралаш баҳслари ўтказиляпти. Куннинг иккинчи ярмида асосий тўрга йўлланма олган барча теннисчилар номи маълум бўлади.
Ўн уч нафар теннисчимизда ана шу йўлланмани қўлга киритиш имконияти мавжуд.
Ҳамюртларимиздан Санжар Файзиув, Темур Исмоилов, Сергей Фомин, Азизбек Луқмонов, Павел Цой ва Саидало Саидкаримов саралаш ўйинларисиз асосий тўрда қатнашиш ҳуқуқини қўлга киритишган.
Қуръа натижасига кўра, Фомин биринчи даврада турнирнинг биринчи ракеткаси, қозоғистонлик Дмитрий Попкога қарши кортга чиқади. Мусобақада 8-рақам остида таснифланган Исмоилов россиялик Евгений Тюрнев билан ҳисоб-китоб қилади. Павел Цой украиналик Вадим Урсу билан муносабатларига ойдинлик киритиб олади. Қолган теннисчиларимизнинг рақиблари саралаш турнири ғолиблари бўлади.
