Buxoro shahridagi “Dilkusho” kortlarida tennis bo‘yicha “Fyuchers” turkumiga kiruvchi turnir davom etmoqda.
Bugun sovrin jamg‘armasi 25 000 AQSH dollarini tashkil qiluvchi ushbu musobaqaning so‘nggi saralash bahslari o‘tkazilyapti. Kunning ikkinchi yarmida asosiy to‘rga yo‘llanma olgan barcha tennischilar nomi ma’lum bo‘ladi.
O‘n uch nafar tennischimizda ana shu yo‘llanmani qo‘lga kiritish imkoniyati mavjud.
Hamyurtlarimizdan Sanjar Fayziuv, Temur Ismoilov, Sergey Fomin, Azizbek Luqmonov, Pavel Soy va Saidalo Saidkarimov saralash o‘yinlarisiz asosiy to‘rda qatnashish huquqini qo‘lga kiritishgan.
Qur’a natijasiga ko‘ra, Fomin birinchi davrada turnirning birinchi raketkasi, qozog‘istonlik Dmitriy Popkoga qarshi kortga chiqadi. Musobaqada 8-raqam ostida tasniflangan Ismoilov rossiyalik Yevgeniy Tyurnev bilan hisob-kitob qiladi. Pavel Soy ukrainalik Vadim Ursu bilan munosabatlariga oydinlik kiritib oladi. Qolgan tennischilarimizning raqiblari saralash turniri g‘oliblari bo‘ladi.
