Европада 2016/2017 мавсум охирига тобора яқинлашиб келаётган бир пайтда кучли бешлик чемпионатларининг баъзи жамоалари жуда кам гол ўтказгани билан метин ҳимоясини кўз-кўз қилмоқда.
Қизиқарлиси, бундай жамоларнинг ҳаммаси ҳам ўз миллий чемпиоантида етакчи эмас. Эътиборингизга кучли бешликда шу пайтгача энг кам гол ўтказган жамоаларни тақдим этамиз.
Кучли ўнликни Англия Премьер Лигаси пешқадами «Челси» бошлаб беради – лондонликлар ҳозиргача 33 та ўйинда 29 та гол ўтказган. «Аристократлар»дан 1 та кам – 28 тадан гол ўтказган жамоалар эса учта бўлиб, улардан бири «Рома» Италия А сериясида иккинчи ўринни, «Монако» Франция 1 Лигасида биринчи ва «Ницца» учинчи ўринни эгаллаб турибди.
Еттинчи ўринда 34 ўйинда 27 та гол ўтказиб, Испания Ла Лигасида 5-ўринни эгаллаб турган «Вилярреал» бормоқда. Олтинчи ўринда эса Ла Лиганинг яна бир вакили – «Атлетико» бормоқда. «Севилья»ни қувиб ўтиб учинчи ўринга ўрнашиб олган мадридликлар ҳозирча 25 та гол ўтказган.
Бешинчи ўриндаги «Манчестер Юнайтед» шу пайтгача 24 та гол ўтказган бўлиб, 33 ўйиндан кейин Премьер Лигада бешинчи ўринни эгаллаб турибди. Франция 1 Лигасида «Монако»ни изма-из таъқиб қилиб келаётган «ПСЖ» эса 34 ўйинда 23 та гол ўтказиб юборган.
Учинчи ўринда Премьер Лигада «Челси»ни таъқиб қилаётган ягона жамоа – «Тоттенҳем» бўлиб, лондонликлар 33 ўйинда 22 та гол ўтказган. Иккинчи ўринда эса 33 ўйиндан 20 та гол ўтказган «Ювентус» бормоқда ва бу туринликларнинг А сериядаги пешқадамлигининг асосий сабабларидан биридир. Ниҳоят биринчи ўринда Бундеслига пешқадами «Бавария» бўлиб, мюнхенликлар ҳозирча 30 та ўйинда атиги 17 та гол ўтказиб юборган.
