Бугун Осиё чемпионлар лигасининг "А" гуруҳида иккита учрашув бўлиб ўтади. "Локомотив" сафарда "Ал-Аҳли" клуби меҳмони бўлса, Доҳада "Ат-Таъвун" "Истиқлол" билан куч синашади.

Гуруҳдаги вазиятга тўхталадиган бўлсак, барча тўрт жамоада кейинги босқичга чиқиш имконияти бор. Айни пайтда "Ал-Аҳли" 8 очко билан биринчи, "Истиқлол" ҳам 8 очко тўплаган ҳолда иккинчи ўринни эгаллаб турибди. Гап шундаки, "Ал-Аҳли" ўз майдонида "Истиқлол"ни мағлуб этган, шу боис дубайликлар биринчи ўринда боришмоқда.

Бугун баҳс "Локомотив" учун ўта муҳим аҳамиятга эга. Чунки ғалабагина "темирйўлчилар"ни кейинги босқичга олиб чиқади. Эслатиб ўтамиз, Тошкентда кечган беллашувда "Локо" бу рақибини 2:0 ҳисобида мағлуб этган. Ўшанда Саламат Қутибоев билан Марат Бикмаевнинг голлари уч очкони келтирганди.

Учрашув ҳақида маълумотлар

- Дубайнинг "Ал-Аҳли" клуби Осиё чемпионлар лигасида 7-марта иштирок этмоқда. "Локомотив" эса кетма-кет учинчи марта гуруҳ босқичида ўйнамоқда.

- Бугунги беллашувда "Ал-Аҳли"ни дуранг натижа ҳам қониқтиради. "Локо"га эса фақат ғалаба зарур.

- "Ал-Аҳли" ОЧЛда ўз майдонидаги охирги 13 учрашувдан бери мағлуб бўлгани йўқ. Бу жамоа сўнгги бор 2010 йил Саудия Арабистонининг "Ал-Ҳилол" клубига 2:3 ҳисобида ютқазиб қўйган. "Ал-Аҳли" ўз майдонида бўлиб ўтган охирги 13та беллашувда беш ғалаба ва 8 дуранг қайд этган.

- "Ал-Аҳли" бунгача ўзбек клублари билан Дубайда тўрт марта ўйнаган. 2002/2003 йилги мавсум саралаш босқичи ҳамда 2009 йил гуруҳ ўйинида улар "Пахтакор"га 0:1 ва 1:2 ҳисоби билан мағлуб бўлишган. Бу жамоа 2005 йил "Нефтчи"дан 3:0 ҳисобида устун келган, 2015 йил эса "Насаф" билан 0:0 ўйнаган.

- Бугун "Ал-Аҳли" таркибида сенегаллик ҳужумчи Макете Диоп майдонга туша олмайди. Чунки унда иккита сариқ карточка бор. Бу жамоа БАА чемпионати турнир жадвалида 3-ўринни эгаллаб турибди.

- "Локомотив" ўз майдонида ўтган охирги икки беллашувда олти очколи бўлиши мумкин эди. Бироқ "темирйўлчилар" сўнгги дақиқаларда гол ўтказиб, ҳар иккала баҳсни ҳам дуранг билан якунлашди. "Локомотив" - "Истиқлол" 1:1, "Локомотив" - "Ат-Таъвун" 4:4.

- "Локомотив" ҳозирча турнир жадвалида охирги ўринни эгаллаб турибди. Жамоа ҳисобида бешта ўйиндан сўнг беш очко бор. Айтиб ўтганимиздек, "Локо" кейинги босқичга чиқиши учун бугун ғалаба қозониши ҳамда "Ат-Таъвун" "Истиқлол"ни мағлуб этмаслиги талаб этилади.

- "Локомотив" шу пайтгача ОЧЛ сафар ўйинларида 11 та баҳсда майдонга тушиб, фақат биттасида ғалаба қозонган. Жамоа БААдаги ўйинларда 2013 йил "Ал Наср"га 2:3 ҳисобида мағлуб бўлган. Шунингдек, ўтган йил "Ал Наср" 1:1 ва "Ал Айн" билан 0:0 ўйнаган.

- Жамоа ҳужумчиси Марат Бикмаев ўзининг 5та голи билан бу йилги ОЧЛ тўпурарлари рўйхатида иккинчи ўринни эгаллаб турибди. Биринчи ўриндаги Меҳди Таремий ("Персеполис") ҳисобида 6та гол бор.

"Ал-Аҳли" - "Локомотив" учрашуви Тошкент вақти билан 20:50да бошланади. Ўйин "Спорт" канали орқали жонли трансляция қилинади.