“Шўртан” клуби сербиялик футболчи Урош Милосавлевичдан бўлган қарзини тўлиқ тўлади.

Жамоа раҳбарияти хабарига кўра, ФИФА талабига биноан унга 13 минг АҚШ доллари тўлаб берилган. Энди клуб Биринчи лигага бадарға қилинмайди.

Эслатиб ўтамиз, сербиялик Урош Милосавлевич 2011 йилги мавсум биринчи ярмида «Шўртан» шарафини ҳимоя қилган. Футболчи ўша йил ёзда Ўзбекистоннинг бошқа бир клуби — «Бунёдкор» аъзосига айланган. Аммо "Шўртан" унга маошининг бир қисмини бермаган. Натижада у ФИФА ташкилотига арз қилган. Тафсилотларни ўрганиб чиққан ФИФА футболчининг фойдасига қарор чиқариб, "Шўртан"ни олдига қарзни тўлаш талабини қўйган. Акс ҳолда ЎФФдан жамоани Биринчи лигага тушириб юборишни сўраган эди.

Ҳозирда 33 ёшда бўлган Урош Милосавлевич футболчилик фаолиятини якунлаган ва футбол агенти сифатида фаолият олиб боради.