«Ливерпуль» клуби Марио Балотеллининг ўта қизиққон феълини ўзига хос тарзда жиловлагани маълум бўлди.

Football Leaks: The Dirty Business of Football китобида нашр қилинган маълумотларга кўра, Марио Балотелли мерсисайдликлар таркибида ўйнаб юрганида, агар мавсум давомида учтадан кам қизил карточка олса, 1 млн фунт мукофот олган.

Агар мавсум давомида футболчи қўпол ҳаракати, тупуриши, сўкиниши ёки ҳақоратли ишораларидан тийилиб, кўпи билан уч марта майдондан четлатилса, у ҳолда 30 июнь куни унга 1 млн фунт мукофот тўланган, деб хабар бермоқда Daily Mail.

Эслатиб ўтамиз, Балотелли «Милан»дан «Ливерпуль»га 2014 йили 20 млн евро эвазига ўтган эди. У жами 28 ўйинда майдонга тушиб, 4та гол урди ва 7та сариқ карточкани олди. Шунингдек, бирор марта майдондан четлатилмади.