Озарбайжон пойтахти Боку шаҳрида давом этаётган IV Ислом бирдамлик ўйинларининг теннис мусобақаси старт олди.
Олимпия шаҳарчасидан 12км узоқликда жойлашган «Баку Теннис Академияси» кортларида бугун терма жамоамиз аъзолари ўз рақибларига қарши беллашишди. Аёллар термамиз мезбон Озарбайжонлик рақибларига ҳеч қандай имконият қолдирмаган ҳолда кейинги босқич йўлланмасига эга бўлишди. Яккалик йўналишида Камола Умарова Алина Гавришни 6:2, 6:0 ҳисобида, Сабина Шарипова эса Умайра Хамишовани 6:1, 6:1 ҳисобларида мағлуб этган бўлишса. Жуфтлик баҳсларида Умарова ва Меренкова тандеми Хамишова/Сафарова жуфтлигидан 6:2 ва 6:0 ҳисобларида устунликка эга бўлишди.
Эркаклар йўналишида терма жамоамиз Туркманистон термасига қарши баҳс олиб борди. Саидаъло Саидкаримов – Георгий Почай қарама-қаршилигида ҳамюртимиз гарчанд биринчи сетни 3:6 ҳисобида бой берган бўлсада, кейинги сетларда 6:4, 7:5 ҳисобларида зафар қуча олди. Сергей Фомин ва Юрий Рогусский учрашувида эса теннисчимиз 2:6, 6:4 ва 4:6 ҳисобида имкониятни бой бериб қўйди. Шу тариқа кейинги босқичга чиқиш масаласи жуфтлик баҳсларидан сўнг аниқланадиган бўлди.
