Европа Чемпионлар лигаси ярим финал ўйинларидан кейин бир қатор рекорд натижалар қайд этилди. Ана шундай рекордларнинг аксарияти Криштиану Роналдуга тегишлидир. Мадриднинг «Реал» клуби ҳужумчиси учта ўйинда саккизта тўп киритиб, чет эл матбуотининг эътиборини ўзига қаратди. Чет эл нашрлари эса футболчининг рекордларини бирин-кетин ёза бошлашди. Биз ҳам бугунги саҳифамизда португалиялик футболчи томонидан шу вақтга қадар ўрнатилган рекорд натижаларни эътиборингизга ҳавола этамиз.
* * *
Португалиялик футболчи Европа Чемпионлар лигаси ярим финаллари тарихидаги энг яхши тўпурар ҳисобланади. Роналду Чемпионлар лигаси ярим финалларида рақиблар дарвозаларини 13 марта ишғол этган. Бу борада футболчи шу вақтга қадар етакчилик қилган афсонавий ўйинчи Алфредо Ди Стефанони (11 та гол) ортда қолдирди.
* * *
Криштиану Роналду Европа Чемпионлар лигаси плей-офф босқичида 50 та гол муаллифига айланган биринчи футболчи ҳисобланади. Айни дамда Роналдунинг бу борадаги кўрсаткичи 52 тага етган.
* * *
«Реал» етакчиси Чемпионлар лигасининг кетма-кет икки ўйинида хет-трик қайд этган биринчи футболчи сифатида тарих саҳифаларидан жой эгаллади. Роналдуеврокубокларда гол уриш бўйича ўз рекордини ҳам янгилашга улгурди.
* * *
Криштиану еврокубокларда 100 та гол уриб, миллионлар тарихида бундай натижа кўрсатган биринчи ўйинчига айланди. Шуни таъкидлаш керакки, айни дамда Роналдунинг еврокубоклардаги голлари 106 тага етган.
* * *
Роналду «Сантяго Бернабеу» тарихидаги тўпурарлар рўйхатининг биринчи ўрнига кўтарилиб олди ва бу борада «қироллик клуби»нинг афсонавий ўйинчиси Алфредо Ди Стефанони ортда қолдиришга эришди. Ди Стефанонинг ҳисобида 210 та гол бор.
* * *
Айни дамда Криштианунинг «Реал»даги голлари сони 402 тага етди. Футболчи голларнинг 282 тасини Испания миллий чемпионати доирасида, 89 тасини еврокубокларда, 22 тасини Испания кубогида, 9 тасини эса бошқа турнирларда киритган.
* * *
Роналду тўпурарлик бўйича «Реал»нинг рекордчиси ҳисобланади. Криштиану бу борада Мадрид жамоасининг яна бир афсонаси — Раулдан (323 та гол) ўзиб кетган.
* * *
Криштианунинг яна бир натижаси таҳцинга сазовор. Роналду Испания чемпионатида 7 йил кетма-кет 30 тадан кўп гол урган биринчи футболчи ҳисобланади.
* * *
Бундан ташқари, Роналду Испания чемпионатининг барча турнирларида кетма-кет 6 йил камида 50 та гол киритган дастлабки футболчи, номини ҳам қўлга киритган.
* * *
Роналду бир йилда (2016 йилда) Европа Чемпионлар лигаси, Европа чемпионати, клублар ўртасидаги жаҳон чемпионатида ғолиб чиққан ҳамда «Олтин тўп» соҳибига айланган биринчи футболчидир. Унинг бу натижасини ҳеч бир футболчи такрорлай олмаган.
* * *
Португалиялик чарм тўп устаси ҳомий ташкилоти билан умрининг охиригача шартнома имзолаган биринчи ўйинчидир. Футболчининг ҳомийси — «Нике» компанияси футболчига йилига 24 миллион доллар тўлайди.
* * *
«Реал» ҳужумчиси ижтимоий тармоқларда 200 миллион нафар ўқувчисига эга бўлган биринчи футболчидир.
* * *
У Чемпионлар лигасининг бир мавсумида гол уриш бўйича рекордчи ҳисобланади, Роналду 2013/2014 йилги мавсумда ЭЧЛда 17 та гол урган.
* * *
Роналду Европанинг топ-6 чемпионатлари тарихидаги энг яхши тўпурардир. Футболчи шу вақтга қадар 367 та гол киритган. Криштиану бу борада Жимми Гривз (366) ва Герд Мюллердан (365) ўзиб кетган.
