Озарбайжон пойтахти Бокуда давом этаётган «Ислом бирдамлик ўйинлари»да Ўзбекистон делегацияси олтинлари сонини 14 тага етказиб олди.
18 май — пайшанба куни делегациянинг олти спортчиси шоҳсупанинг энг юқорисидан жой олди.
Бокснинг -56 килограммгача бўлган вазн тоифасида Абдулҳай Шораҳматов, -64 килограммача вазнида Алиёр Норалиев ва -69 килограммли спортчилар ўртасидаги мусобақасида Бобо-Усмон Батуров барча рақибларини мағлуб этишга муваффақ бўлди.
Шунингдек, енгил атлетиканинг баландликка сакраш мусобақасида Надия Дусанова, таэквондонинг -74 килограмм вазн тоифасида Никита Рафалович ҳамда пара-атлетиканинг найза улоқтириш мусобақасида Александр Свечников Ўзбекистон делегацияси учун олтин медаллар олиб берди.
18 май куни Мўминжон Абдуллаев юнон-рум курашининг 100 килограммгача бўлган спортчилари ўртасидаги мусобақасида ва Умида Абдуллаева таэквондонинг 62 килограммгача бўлган қизлари турнирида кумуш медалини қўлга киритди.
Пайшанба куни қўлга киритилган ягона бронза енгил атлетикачи Нигина Шариповага тегишли бўлди.
Ўзбекистон терма жамоаси умумжамоа ҳисобида 4-ўринни эгаллаб турибди. Айни пайтда делегация спортчилари қўлга киритган олтин медаллар сони Эрон термасиникидан 2 тага камроқ.
