Ozarbayjon poytaxti Bokuda davom etayotgan «Islom birdamlik o‘yinlari»da O‘zbekiston delegasiyasi oltinlari sonini 14 taga yetkazib oldi.
18 may — payshanba kuni delegasiyaning olti sportchisi shohsupaning eng yuqorisidan joy oldi.
Boksning -56 kilogrammgacha bo‘lgan vazn toifasida Abdulhay Shorahmatov, -64 kilogrammacha vaznida Aliyor Noraliyev va -69 kilogrammli sportchilar o‘rtasidagi musobaqasida Bobo-Usmon Baturov barcha raqiblarini mag‘lub etishga muvaffaq bo‘ldi.
Shuningdek, yengil atletikaning balandlikka sakrash musobaqasida Nadiya Dusanova, taekvondoning -74 kilogramm vazn toifasida Nikita Rafalovich hamda para-atletikaning nayza uloqtirish musobaqasida Aleksandr Svechnikov O‘zbekiston delegasiyasi uchun oltin medallar olib berdi.
18 may kuni Mo‘minjon Abdullayev yunon-rum kurashining 100 kilogrammgacha bo‘lgan sportchilari o‘rtasidagi musobaqasida va Umida Abdullayeva taekvondoning 62 kilogrammgacha bo‘lgan qizlari turnirida kumush medalini qo‘lga kiritdi.
Payshanba kuni qo‘lga kiritilgan yagona bronza yengil atletikachi Nigina Sharipovaga tegishli bo‘ldi.
O‘zbekiston terma jamoasi umumjamoa hisobida 4-o‘rinni egallab turibdi. Ayni paytda delegasiya sportchilari qo‘lga kiritgan oltin medallar soni Eron termasinikidan 2 taga kamroq.
