Ғузорнинг «Шўртан» клуби ФИФА қарорига кўра, Олий лигадан четлатилади.
Қашқадарё вилояти вакили сербиялик футболчи Урош Милославлевич билан имзолаган шартнома бандларини бажармаганлиги учун шундай жазога лойиқ кўрилди.
Сербиялик Урош Милосавлевич 2013 йилги мавсум биринчи ярмида «Шўртан» шарафини ҳимоя қилган. Футболчи ўша йил ёзда Ўзбекистоннинг бошқа бир клуби — «Бунёдкор» аъзосига айланган. Аммо «Шўртан» клубидан ойлик-маошини ололмаган ва ФИФА ташкилотига арз қилган.
Вазиятни ўрганиб чиққан ташкилот «Шўртан» клубига қарзни тўлаш бўйича мухлат берган. Журналист Алишер Никимбаевнинг хабар беришича, «Шўртан» ФИФА белгилаган муддатда футболчилар олдидаги қарзларни тўламаган. Клуб қарзларни тўлаган вақтда эса ФИФА белгилаган муддат ўтиб бўлган.
Энди «Шўртан» Олий лигадаги натижалари қандай бўлишидан қатъий назар, келаси мавсумни Биринчи лигада ўтказади.
