Ўзбекистон кубогининг бу йилги мавсумида "Нефтчи" жамоаси муваффақиятли тарзда одимламоқда.
Фарғона клуби мусобақанинг нимчоракфиналида "Навбаҳор"га қарши рақобат олиб бориб, икки ўйин натижасига кўра навбатдаги босқичга йўл олди. Жамоа дарвозабони Абдумавлон Абдужалилов эса клуб матбуот хизматига берган интервьюсида жамоанинг Ўзбекистон Кубогидаги иштироки ҳақида фикр билдирди
«Биринчи ўринда мухлисларга катта раҳмат айтмоқчиман. Чунки уларнинг улкан далдаси билан Ўзбекистон Кубогидаги юришимизни давом эттирамиз. Айнан ишқибозларнинг қўллаб-қувватлаши натижасида "Навбаҳор" тўсиғидан ўтдик деб ўйлайман. Шунингдек йигитларнинг машғулотлардаги меҳнатини ҳам алоҳида эътироф этиш керак. Наманганда жуда оғир баҳс кечди. Хар иккала жамоа ҳам кейинги босқичга чиқишни жуда истаган эди. Бироқ мазкур қарама-қаршиликда бизнинг истагимиз кучли бўлиб чиқди. Шерзод Ҳакимовнинг супер голига алоҳида тўхталиб ўтмасам бўлмайди. Дарвозабон сифатида шуни айта оламанки, бундай маҳорат билан берилган зарбани қайтариш жуда қийин. Гол ҳақиқитдан ҳам чиройли чиқди. Жамоамизнинг ўйини аста-секин кучайиб бормоқда. Ўзбекистон Кубогида ҳам муносиб иштирок этишни истаймиз. Мақсадимиз хар бир беллашувда мухлисларимизни хурсанд этиш», - деди Абдужалилов.
