Англия футбол ассоциацияси (FA) «Сандерленд»нинг собиқ бош мураббийи Дэвид Мойесни 30 минг фунт жаримага тортди.

FA шотландиялик 54 ёшли мутахассисни аҳлоқ меъёрларини қўпол бузганликда айблади.

Эслатиб ўтамиз, Дэвид Мойес ВВС журналисти Вики Спарксга нисбатан қўполлик қилган эди. Журналист аёл АПЛ 29-туридан ўрин олган «Бёрнли»га (0:0) қарши ўйиндан сўнг мураббийни ноқулай аҳволга солган. Хусусан у, «Сандерленд» хўжайини Эллис Шортнинг стадионга ташриф буюриши Мойеснинг келажагини сўроқ остига қўядими, деган савол билан мурожаат қилган.

Мойес матбуот-анжуманидан кейин Спаркс ёнига келиб: «Бу жуда қўпол гап бўлди, ўзингга эҳтиёт бўл. Аёл киши бўлишингга ҳам қараб турмайман, тарсаки еб қолишинг мумкин. Кейинги сафар савол бераётганингда ўйлаб гапир» - деган. Спаркс мураббийнинг бу гапларини билдирмасдан ёзиб олишга муваффақ бўлган, аммо унинг устидан ҳеч қаерга шикоят қилмаган. Аммо воқеадан хабар топган ВВС раҳбари Мойесга қўнғироқ қилиб, уни мухбирни қўрқитишда айблаган ва судга мурожаат қилишини айтган. Кейинроқ Мойес аёлга қўнғироқ қилиб, кечирим сўраган. Спаркс ҳам, ВВС ҳам мураббийнинг узрини қабул қилган.

Аммо бу воқеа матбуотда ошкор бўлиб кетгач, FA мутахассис устидан иш очишга қарор қилган эди.

Айни пайтда Мойес «Сандерленд» бош мураббийлигидан кетган.