Криштиану Роналдунинг яқин дўсти ҳисобланган аргентиналик журналист Мартин Либерман футболчининг "Реал"дан кетишга қарор қилгани билан боғлиқ янги маълумотларни ошкор қилди.

"Узоқ вақт давомида ҳамма мендан Роналду ҳақида сўраб келади. Аммо мен Криштианунинг ўзи билан гаплашмагунча ҳеч нарсани айтмасдим. У билан муносабатларимиз яхши, биз тез-тез гаплашиб турамиз.

У ҳозир Россияда. Барча эътиборини Португалия терма жамоаси ўйинларига қаратган. Лекин у "Реал"дан қаттиқ хафа бўлган. Криштианунинг фикрича, клуб уни ҳимоя қилмаган. Клуб раҳбаридан бири омма олдида футболчини қўллаб-қувватлайди, деб ўйлаганди. Солиқ идоралари томонидан қўйилаётган айбловлар ҳаққоний эмас, деб ҳисоблайди Криштиану.

Назаримда, президент, вице-президент ёки спорт директори оммавий равишда уни қўллаб-қувватлаши керак эди, аммо бундай бўлмади. Бу эса футболчи ва клуб ўртасидаги муносабатни совуқлаштирди.

Кўрамиз, барчаси нима билан тугаркан. Роналду қаттиқ хафа бўлган, аммо ҳозир фақат Португалия терма жамоаси ҳақида ўйламоқда", – деди Либерман.