Португалиялик агент Паулу Барбоза «Реал» ҳужумчиси Криштиану Роналдунинг муаммолари ҳақида гапириб берди.

«Ғазнага тўланиши шарт бўлган 15 млн евро Роналду учун пул эмас. Унда ғурур, обрў ва доғ тушмаган ном бор. Роналдуни мана шу нарса қизиқтиради.

Аслида у Моуриньо, Маскерано ва Рикарду Карвальога ўхшаб, жарималарни тўлаб, ортиқча ғавғодан қутулиб қолиши мумкин эди. Энди эса ишни чигаллаштириб юборди.

Бу можарога «Реал» ҳам аралаша олмайди, чунки Роналду имиж ҳуқуқларини сотиш орқали олган даромадидан солиқ тўламаган. Унинг атрофидагилар эса футболчини бошқа клубга кетиши ҳақида гапириб, вазиятни янада оғирлаштирмоқда. Бу – ақлсизлик. Чунки «Реал»сиз Роналду умуман бошқача футболчи бўлиб қолади.

Энди уни суд маҳкамаси кутмоқда. Бошқа йўл йўқ» - деди Барбоза.