«Эвертон» ҳужумчиси Ромелу Лукаку «Манчестер Юнайтед» сафига қўшилишдан олдин Лос-Анжелесда тиббий кўрикдан ўтади.

Бельгиялик футболчи ҳозирда Калифорнияда «МЮ»нинг бошқа футболчиси Поль Погба билан бирга таътилни ўтказмоқда. Лукаку бугун, жума куни Англияга қайтиши керак эди, аммо у Жозе Моуриньо жамоаси сафига Лос-Анжелесда қўшиладиган бўлди. «МЮ» 9 июль, якшанба куни АҚШга етиб боради.

Аввалроқ 24 ёшли ҳужумчига асосий даъвогар сифатида «Челси» тилга олинаётганди.

Агар Лукакунинг трансфери амалга ошса, бу «МЮ» сафига қўшилган иккинчи янги футболчи бўлади. Аввалроқ манкунианликлар «Бенфика» ҳимоячиси Виктор Линделёф билан шартнома имзолашганди.

«Манчестер Юнайтед» АПЛнинг 2016/17 йилги мавсумида голлар сони бўйича топ-7 жамоалари орасида энг паст натижа қайд этишди. Топ-3 жамоалари мавусум давомида 80тадан ортиқ тўп киритишган.

Златан Ибраҳимович 17та гол билан «МЮ» тўпурарига айланган бўлса, Ромелу Лукаку 25та гол уришга муваффақ бўлди.