«Аякс» яримҳимоячиси Абдулҳақ Нурий «Вердер» клубига қарши ўртоқлик ўйинида майдонга ҳушсиз йиқилди.
Шундан сўнг, тиббий ёрдам вертолёти майдонга қўниб, 20 ёшли футболчини зудлик билан шифохонага олиб кетди. Ўйин тўхтатилди ва мухлисларга стадионни тарк этиш тавсия қилинди.
Сўнгги маълумотларга қараганда, Нурий юрагидаги аритмия туфайли ҳушидан кетган. Айни пайтда унинг аҳволи яхши.
Абдулҳақ Нурий «Аякс» тарбияланувчиси ҳисобланади. У 2015 йилда жамоа таркибида дебют қилган.