Давралар оралиғида «Бухоро» таркибида ўзгаришлар юз берди.
Биринчи даврани “Бухоро” сафида ўтказган дарвозабон Эркин Жабборов, яримҳимоячи Жасур Ҳасанов ва ҳужумчи Алишер Шоғуломов эндиликда фаолиятини бошқа жамоада давом эттиради.
«Бунёдкор» сафида Осиё чемпионлар лигасида ўйнаб, ўзига яраша тажриба орттирган Алишер Саноев яна «Бухоро»га қайтди.
Мухлисларга «Насаф»даги ёрқин фаолияти орқали яхши таниш бўлган Азамат Алланиёзов жорий мавсумнинг дастлабки қисмини “Қизилқум”да ўтказди. Яқинда Азамат навоийликлар билан хайрлашгач, «Бухоро»дан тушган таклифни қабул қилди.
Маълумот учун, қорақалпоғистонлик 28 ёшли ҳужумчи биринчи даврада “Қизилқум” сафида 14та баҳсда (798 дақиқа) майдонга тушиб, ўз ҳисобига 2та гол ёздириб қўйишга эришди.
«Бухоро» ўз сафига икки нафар ҳимоячини қўшиб олди. Жорий мавсумнинг биринчи даврасини “Навбаҳор”да ўтказган Алишер Саматов билан Тоҳир Шамситдинов эндиликда жамоада ўйнайдиган бўлди. Саматов биринчи даврада “лочинлар” таркибида 10та (775 дақиқа) ўйинда иштирок этган. Шамситдинов эса 8та (294 дақиқа) учрашувда харакат қилган.
