Davralar oralig‘ida «Buxoro» tarkibida o‘zgarishlar yuz berdi.

Birinchi davrani “Buxoro” safida o‘tkazgan darvozabon Erkin Jabborov, yarimhimoyachi Jasur Hasanov va hujumchi Alisher Shog‘ulomov endilikda faoliyatini boshqa jamoada davom ettiradi.

«Bunyodkor» safida Osiyo chempionlar ligasida o‘ynab, o‘ziga yarasha tajriba orttirgan Alisher Sanoyev yana «Buxoro»ga qaytdi.

Muxlislarga «Nasaf»dagi yorqin faoliyati orqali yaxshi tanish bo‘lgan Azamat Allaniyozov joriy mavsumning dastlabki qismini “Qizilqum”da o‘tkazdi. Yaqinda Azamat navoiyliklar bilan xayrlashgach, «Buxoro»dan tushgan taklifni qabul qildi.

Ma’lumot uchun, qoraqalpog‘istonlik 28 yoshli hujumchi birinchi davrada “Qizilqum” safida 14ta bahsda (798 daqiqa) maydonga tushib, o‘z hisobiga 2ta gol yozdirib qo‘yishga erishdi.

«Buxoro» o‘z safiga ikki nafar himoyachini qo‘shib oldi. Joriy mavsumning birinchi davrasini “Navbahor”da o‘tkazgan Alisher Samatov bilan Tohir Shamsitdinov endilikda jamoada o‘ynaydigan bo‘ldi. Samatov birinchi davrada “lochinlar” tarkibida 10ta (775 daqiqa) o‘yinda ishtirok etgan. Shamsitdinov esa 8ta (294 daqiqa) uchrashuvda xarakat qilgan.