"Насаф" клуби қисқа таътилдан қайтиб, иккинчи даврага тайёргарликни бошлади.
Айни пайтда машғулотлар Қарши шаҳрида олиб борилмоқда. Унда Равшан Ҳайдаров бошчилигидаги U-22 терма жамоа йиғинига жалб этилган футболчилар Дониёр Нарзуллаев, Бобир Абдухолиқов, Шароф Муҳитдинов, Умиджон Эргашев, Азизжон Ғаниев ва Одилжон Ҳамробеков иштирок этмаяпти.
Легионерлар Драган Черан ва Игорь Голбан эртага жамоа қароргоҳига етиб келади ва машғулотларга киришади.
Жамоани Элдорбек Суюнов ва ҳимоячи Шерзод Аъзамов расман тарк этган. Ушбу футболчилар энди “Пахтакор” клубида фаолиятини давом эттиришади.
“Насаф” иккинчи давра тайёргарликлари юзасидан 17 июл куни Тошкентда “Навбаҳор” жамоаси билан ўртоқлик учрашуви ўтказади. 18 июл куни эса жамоа тиббий назоратдан ўтади.
